Sam u CM da ki M-Tab sha ki samla pule ka WGH; kut jingmut ban kyntiew ia ki kor digital hapdeng ki samla pule

Syllad | The Rising MeghalayaJanuary 15, 2025

U Myntri Rangbah ka jylla u Conrad K Sangma ha ka 14 tarik Kyllalyngkot u la sam da ki M-Tab (learning tablets) sha ki samla pule ka West Garo Hills ha ryngkat u Lamphang ka iingdorbar thaw ain ka jylla u Thomas A Sangma ha ka jingialang ba la pynlong hapoh District Auditorium, Tura.

Kane ka jingsam ia kine ki M-Tab ka long shibynta jong ka Chief Minister’s Student Digital Learning Scheme kaba thmu ban kyntiew ia ka pule puthi lyngba ki kor ki bor digital ha ka jylla. Kine ki Tablet ki dei kiba la pynrung ia ki bynta kiba kongsan kiba iadei bad ki eksam na ka bynta ki jingpule Higher Secondary level, kiba kynthup jingkylli bapher bapher, ki jingkylli barim, ki jubab halor ki jingkylli jong ki eksam bapher bapher.Nalor kata ka don ruh ia ki dur video, ki sur kren, ki animation bad ki 3D graphic.

Haba kren ha ka jingialang, u CM u la ong, “Kane ka tiar kam dei satia tang ka gadget, hynrei ka tiar ka ban pynkupbor ia ki samla jong ngi. Ngi kwah ban pynthikna ba ki samla jong ngi kin ioh ia ka lad jingpule bad ruh ban don ia ki kor pynkhreh ban iakhun ia ki eksam bapher bapher.”

“Kane ka prokram ka long ka long ban pyntip sha phi ba ngi don ka jingpyrkhat na ka bynta jong phi, kumjuh ban tip ruh ba haduh katno ngi shaniah haphi,” ong u Conrad kaba bynrap ba ka technology ka wanrah ki jingkylla ha kiba bun ki bynta jong ka jingim.

U la ong ruh ba kane ka sorkar ka ngeit ba ha kano kano ka rukom ruh ngi dei ban pynkhlain ia ka jingpyndonkam ia ki kor technology khnang ban pynthikna ba ngin lah ban pynlong ia ka jingpule kaba don ka jingktah, kaba kham don jingmut, kaba sngewtynnad bad sngewkmen.

U la ong ba ka ‘digital learning’ lyngba ki sur, ki dur bad ki video ka kham pynsuk bad pynsngewthuh shibun ia ka jingpule. “Ngi don ia ka jingngeit kaba skhem ba ka jingpynkhlain halor ka jingpyndonkam ia ki technology naduh ka tynrai, ki smart classroom kumta ruh ka digital learning kan iarap shibun ia ki samla pulir jong ngi..hynrei dei ban kynmaw pat ba ka technology ka dei tang nongplie lad bad ka ban iarap ban pynsuk ia phi ha ka liang ka pule puthi,” u la bynrap.

Ha kajuh ka por u pyntip ruh ba ka sorkar ka la shimkhia ban kyntiew ha ka liang ka IT ha ka jylla, kata kaba kynthup ha kaba thaw ia ki IT Park ha Shillong bad Tura bad ka jingpyniaid ia u Optical Fibre.

“Ngi kyrmen ba ia kane ka project yn lah ban pyndep ha kine ki ar snem ki ban wan.Ngi kyrmen skhem ruh ba baroh ki skul kin ioh ban pyndonkam ia ki Optical Fibre. Kan kham shim por hynrei ka sienjam ka la iaid shakhmat,” ong u CM.

Nalor kata u pyntip ruh ba ka IT Park kaba la don lypa ha Shillong ka la aijingshakri ia ki briew kiba naduh na United States bad Europe. “Ki samla shynrang kynthei jong ngi na Meghalaya ki la trei ha ki kompeni AI. Ki la iarap ban pynbiang ia ki kompeni AI ha US, Europe halor ki sienjam kiba batai lypa halor ki jingpang ha ki mar rep, jingbatai lypa ia ka jinghap slap, ka jingheh jingsan jong ki jingthung jingtep, ka jingdonkam ia ka um bad kiwei kiwei.Ia kine baroh la leh na Meghalaya, bad kane ka dei ka jingkylla kaba la wan jia,” u la bynrap.

Haduh palat 1 lak tylli ki Tablet la dep ban sam naduh u snem 2021 sha ki khynnah puke klas XI. Ha u snem 2023-24 haduh 30,480 ngut ki samla pule katkum ka jingioh lum jingkhein jong ka Tnad Directorate of School Education and Literacy ki la ioh jingmyntoi lyngba kane ka skhim.

Ha ka district West Garo Hills yn sam kumba 3000 tylli ki M-Tab. Ha ka jingsam haka sngi ba ar, palat 400 ngut ki khynnah skul na ki 21 tylli ki skul heh bapher bapher ki la ïoh ïa ki tablet.

Haduh 5,700 ngut ki nonghikai na ki kyrdan higher secondary bapher bapher ha ka jylla kin ioh ia kane ka tablet, kaba pynsuk ia ka e-learning bad ki jingpeit bniah.

Ka Vidya Samiksha Kendra, kaba dei ka App ban pyniaid ia ka jingpule kaba la shna da ka tnad Information and Technology, ka sorkar Meghalaya, kaba thmu ban buddien ia ki jingmih ha ka jingpule, ka iarap ruh ia ki nonghikai ban buddien bad bishar bniah iaki khynnah skul.