Sam u MLA Jowai iaki jaka pyllang ñiut ha iing ban pyniakhlad iaki ba pyut bad bym pyut

Syllad | The Rising MeghalayaNovember 18, 2021

U MLA ka Jowai Ma Wailadmiki Shylla ula sam iaki Household Bins ne ki jaka pyllang ñiut haki iing ki sem ban pynkhlad iaki pyut bad bym pyut haka jingpynshai paidbah iaka rukom bret ñiut kaba la pynlong da ka Jowai Municipal Board ha Chutwakhu Indoor Hall haka sngi Balang.

Kine ki jaka pyllang ñiut ki don ar jait kiba blue ban bret iaki ñiut bym pyut (Non-Biodegradable) bad kiba jyrngam ban bret ia kiba pyut (Bio-Degradable).

Ka Kong B Blah Chief Executive Officer (CEO) Jowai Municipal Board haka jingkren maitphang ka la ong, ba kadei ka sien pyrshang kaba nyngkong jong ka ka JMB ban ïakhun ïaki ñiut da kajuk stad kaba mynta (Scientific method) kata da kaba pynïakhlad ïaki ñiut kiba pyut (Biodegradable Waste) ban thep haka borti kaba Jyrngam bad ki ñiut ki bym pyut (Non-biodegradable Waste) ban thep haka borti kaba Blue bad ïa kane la leh khnang ban wanrah ka jingkhuid jingsuba haki ïing ki sem bad ki sawdong sawkun ka sor Jowai.

Ka la ïathuh ba kumba long mynta ka jingpynmih ñiut haki ïing ki sem hapoh sor Jowai kynthup haki ïew ki hat ka la kot shaka 60 ton haka shisngi.

Kane ka jingpyrshang jong ka JMB kan nym long kaba seisoh lym da khlem ka jingïatreilang jong ki Dorbar Shnong bad ka la kyntu ïaki nongialam Shnong ban pynsngewthuh ïaki nongshong Shnong khnang ba kin lah ban bret ïaki ñiut haka rukom kaba biang.

Haba ïadei bad ka rukom lum ïaki ñiut ka long ba kan sa wan kit ka JMB bad ïaka sngi yn sa pynbeit da ka pali kaba yn sa pyntip lyngba ki Dorbar Shnong. Kala kyntu ia ki shnong ha sor Jowai ban shimkabu iaki skim bapher bapher kiba pyntreikam ka JMB.

U Wailadmiki Shylla haka jingkren ula ïathuh ba ka JMB ka la ïoh ïaka jaka pyllang ñiut kaba pura bad ula ïathuh ba ïaki ñiut ki bym pyut kiba pyllang ha man ki thiew ïing ka JMB kan phah ïaki sha ki karkhana kiba don ha Rilum Jaintia ban thang ia kine ki ñiut ban saiñ karkhana dewbilat.

Ki Kam Pynroi ka Jowai

Shuh shuh u kum u nongmih khmat paitbah ka thaiñ u Shylla ula pynsngew ruh ia kiba bun ki kam ba ula leh na ka bynta ka roi ka por jong ka Constituency kum ka Beautification of Jowai Town ne ban pynkylla dur ïaka sor Jowai ula ïathuh ba ïa kane la dep ban khot tender haka dor kaba 12 klur 36 lak tyngka.

Haba ïadei bad ki surok, ula ïathuh ba ula pynrung hapoh ka Smart Road lyngba ka World Bank bad yn pynbha kumba 33 kilometre ki surok hapoh ka sor Jowai bad u khmih lynti ba ha u bnai Kyllalyngkot yn khot tender noh.

Ka Umngot Water Supply Scheme kaba la sahteng da ki phew snem ula ong, ba mynta kane ruh ka la ïaid shakhmat, ki kor ne pumping machines la dep ban test bad ki long kiba biang lut bad kumba long mynta dang sah sa tang ki pipe lineline namar ba don ki pipeline kiba la julor.

Haba ïadei bad ka Mini Secretariat kaba la thmu ban tei ha Jowai kaba don ha phyllaw jong ka PWD ula ong ba ïa kane ruh la dep mang pisa kumba 45 klur tyngka.

Katba iaka jaka theh ñiut pat u MLA ula ong kila ioh iaka jaka kaba 100 acre, hynrei iaka jaka um shym la iathuh hangno.