Sam u Myntri ka Sorkar Pdeng ia ki shithi thungkam sha ki samla ha ka Rozgar Mela ha Shillong

Syllad | The Rising MeghalayaApril 27, 2025

U Myntri khynnah ka Sorkar Pdeng uba khmih ia ka Tnad kam bar ri bad Textile u Pabitra Margherita ula wan ban iashimbynta haka Rozgar Mela 2025 kaba pynlong ha ka 26 tarik Iaiong hapoh State Convention Centre, Shillong. La iadonlang ka Chief Commissioner ka Income Tax, Shillong, N Longvah lem bad kiwei kiwei ki heh ki hain.

Baroh ki la don haduh palat 51,000 ki shithi thungkam thymmai ha ki Tnad sorkar bapher bapher la aiti sha ki samla ha ka Rozgar Mela kaba 15 kaba la long ha ki 47 tylli ki jaka ha kylleng ka ri.

Ha ka jingkren u Pabitra u la batai ia ka Rozgar Mela kum ka khyrdop ban tei ia ka Ri India kaba khlain. “Kine kim dei tang ki kam, ki dei ki khyrdop ban tei ia ka ri. Ha kine ki shisnem shiteng ba la dep ngi la pynlong ia ka jingpynrung kam da ka lynti kaba khuid ba suba, kaba pynapw ia ka thong jong ka sorkar jong ngi,” ong u Myntri.

“Ka long kham palat ban ia ka shithi. Ka jingiaid lynti nangne shakhmat kam dei tang ban tei ia ka kam hynrei ban noh synniang sha ka khana ka jingroi jong ka ri India. Uwei pa uwei u nongshong shnong uba phi shakri u pynwandur ia ka lashai jong ka ri India. To ngin ia jam ryngkat lang sha ka thong jong ka Aatmanirbhar Bharat kaba la pynioh mynsiem lyngba ka Sabka Saath, Sabka Vikas,” u la ong.

Haba pdiang sngewbha ia kine ki dkhot ba dang pynrung kam thymmai, ka Kong N Longvah ka la ai ka jingkhublei bad pynpaw ka jingsngewnguh kaba kyrpang ia u Myntri khynnah halor ka jingpynlong ia kane ka jingialang. “Ka Rozgar Mela ka pynpaw ia ka jingkut jingmut ba skhem jong ka sorkar halor ki lad aikam ai jam hapoh ka jingialam jong u Myntri Rangbahduh ka ri u Narendra Modi,” ka la ong. “Kane ka jingthungkam mynta ka sngi ka dei tang ia ki jingjop jong uwei pa uwei hynrei ka dei ka sienjam ka ban pynkhlain ia ka jingai jingshakri jong ki paidbah ha ka ri.”

Da kaba bynrap ia ka jingiohi jong ka ri, u Myntri Rangbahduh ka Ri u Narendra Modi u la aijingkren ha kane ka jingialang lyngba ka video conference. Haba pynpaw ia ka bynta jong ki samla ban tei ia ka ri, u Modi u la ong, “Haba ki samla ki noh synniang shitrhem ha ka ban tei ia ka ri, ka ri ka mad ia ka jingroi sted bad ka ioh ia ka jingithuh ha ka rynsan jong ka pyrthei. ” U la ban jur ba ki sienjam kum ka Skill India, Startup India, bad Digital India ki la plie ia ki lad thymmai na ka bynta ki samla nong India ban pynurlong ia ka sap ka phong jong ki.”

Haba ai khublei ia kine ki samla kiba rung thymmai sha ka kam, u PM u la bynrap da kaba ong, “Ka jingshah thungkam ka jong phi ka dei ka jingmih na ka jingtrei shitom bad ka jingaiti lut ka jong phi. To sngew sarong ia ka lad ban sahkri ia ka ri.”

Kine ki samla kiba la shah pynrung thymmai sha ka kam kin pyniasoh bad ki Ministry bad ki Trnad bapher bapher kiba kynthup ia ka Tnad Revenue, Ministry of Railways, Ministry of Home Affairs, Department of Posts, Ministry of Labour and Employment nalor kiwei kiwei.