San sngi ai jinghikai rep jhur tit ka JHDS

Syllad | The Rising MeghalayaDecember 2, 2021

Kum shibynta ban kyntiew ia ka ioh ka kot jong ki Nongrep, ka Jaintia Hills Development Society (JHDS) ha ryngkat bad ka jingiatreilang bad ka Ophis jong ka NABARD Jaintia Hills District, ka la pynlong ia ka jingai jinghikai ba san sngi lynter halor ka rukom rep jhur tit Oyster Mushroom ba lah ban rep hala ki jong ki ïing ki sem.

Ia kane ka Training prokram la sdang naduh 24-30 Naiwieng ha Samanlang Socio Cultural Center Bishop’s House Lumbihsyntu.

La plie ia kane ka prokram jinghikai da u Director ka JHDS u Fr. Manbha Pakem ha ryngkat ka jingiadonlang u State Officer ka Caritas India u Sir Prabal Sen bad u Coordinator ka JHDS u Bah Denis Kurkalang.

Haba ai jingkren ha ka sngi plie, u Fr. Manbha Pakem u la kyntu jur ia ki nong iashymbynta ba ki dei ban pyntreikam bha ia ka jinghikai ba ki la ioh ym ban shu sahkut tang ha ka jingtip khlem da pyndonkam. U la kren bynniaw ruh ba bun na ki nongrep kim shem la pyndonkam hok ia ki lad jingiarap bad jinghikai ba ka Sorkar ka la ai na ka por sha ka por. U la ong ruh ba ka JHDS kan sa bud dien ban pyntikna ba baroh kiba la ioh jinghikai kin sdang noh ban seng ia la ka kam lajong.

Ki nong iashymbynta ha kane ka prokram ai jinghikai ki don kumba 30 ngut ki longkmie na Thadlaskein bad Laskein Block. Ia ka jinghikai la ai da u Ma Cheku Aman Pariat, u ba dei u Senior Research Fellow jong ARYA Project ka KVK Jowai. Ha ka sngi ba saw jong ka prokram la ioh ruh ia ka jingbatai halor ki schemes bad ki loans kiba iadei bad ki jingmyntoi ba ki nongrep ki lah ban ioh na ki Bank ba la ithuh da ka Sorkar ba la ai da u Branch Manager ka Meghalaya Rural Bank Jowai Branch u Ma A Pyrtuh.

La pynkut ia kane ka prokram ai jinghikai da ka Exposure Trip, ha kaba ka JHDS ka la ialam ia kine ki Nongrep sha ka Ophis jong ka Directorate of Horticulture Mushroom Development Center Upper Shillong ha ryngkat ka jingiadonlang u Asst. Director ka Horticulture Mushroom Unit u Bah Sumar Kharlukhi.