Sangah tyngeh u ma Comingone Ymbon ia kiba pyrshah ñiut Jowai

Syllad | The Rising MeghalayaApril 25, 2022

U Ma Comingone Ymbon MLA Raliang ula sangah tyngeh ia kiba pyrshah iaka jingthmu thied jaka sorkar ban shna jaka bret ñiut ka Jowai.

U Ma Coming Ymbon haba kren shuh shuh kum u kongsan haka sngi Nyngkong haka prokram FOCUS jong ka Meghalaya Basin Management Agency (MBMA) ban sam jingkyrshan sha ki nongrep ha Moosyiem Shangpung, ula ong ka khubor kaba u kwah ban ai ka long halor ka ñiut Jowai.

“Ka jhep ne ka niut ha Jowai baroh phi la iohi iaka ñiut ha Jowai, wat rkhie kane ka dei ka jingktkhlieh ka jong phi jong nga, lada ka sorkar ka thmu ban bret ñiut ha Shangpung baroh ki nongshong shnong ki pyrshah.”

“I don’t Like ne ngam sngewtynnad ia kane ka rukom pyrkhat, lada ong ban bret ñiut ha Shillang Myntang baroh ki briew bad ki sengbhalang ki pyrshah, hato ka Jowai kam hap hapoh ka district jong ngi, ngan ong ia phi lada kumne ngin pyrshah ngim poi shaei,” la ong u ma Comingone Ymbon.

“Kala dei ka por ban mihshakhmat ban iakren iaka ñiut ha Jowai. Ade..,kat shaba mut ka sorkar ban shna jaka theh ñiut phi pyrshah bad kan sa poi ka por ba lada ka sorkar ka thmu ban shna umbam umdih phin sa pyrshah,” la ong u ma Comingone bad ula appeal ia baroh iakren ia kane ka mat ne ka jingeh ka ñiut khnang ban kan nym ktah iaka roi ka par.

U Ma Comingone ula ong “Phi lah ban pyrshah, hynrei ka dei ban don ka nongrim ban pyrshah, hynrei la poi u pud haduh ba Jowai ka hap khangdam katno ka jingktah iaki khun ki kti jong ngi kiba im jakpoh ha Jowai.”

Haba kren halor ka FOCUS u Ma Coming ula ong baka jingsynniang ki Self Help Group ne SHGs sha ka imlang ka sahlang ka long kaba khraw bad kala wahrah shibun ki jingkylla ka lad sengkam sengjam bad ka lad kamai jakpoh.

Ula kyntu iaki nongrep ne ki nongpynmih mar ban pyndonkam hok iaka jingiarap kaba kila ioh na ka FOCUS ban saindur janai iaki kam ki jam ban myntoi ka shnong ka thaw bad ialade shimet.

Kiwei kiwei kiba kren ki kynthup ia ka Kong Danida D Syngai, Additional Deputy Commissioner bad DPO Planning Branch, Jowai, Dr. D.I Kjam, District officer A.H & Veterinary, Jowai, Sywell Lyngdoh, District Project Manager, District Basin Development unit, Jowai.