Sangeh ia ka drama politics; ong ka Kong Ampareen ia ka Seng Hindu ba thmu pynlong rally

Syllad | The Rising MeghalayaSeptember 18, 2024

Ka Myntri ka Tnad ka Koit ka Khiah ka Kong Ampareen Lyngdoh haka 17 tarik Nailur ka la ong ba ka Sorkar kam lah satia ban ailad ia ki drama politics jong ka Seng Hindu kaba thmu ban pynlong ia ka rally ialap khang shoh doh bad bam don Masi bad ban pynthut ia ka shongsuk shongsain hapoh ka Jylla.

Haba kynthoh halor ka jingthmu jong kane ka seng ban pynlong ia ka yatra bad ban pynbna ia ka Masi kum ka Kmie jong ka Ri ha ka 2 tarik u Risaw ha ka nongbah Shillong, ka Kong Ampareen ka la ong “Nga iai ban ba ka Meghalaya ka dei ka Jylla kaba suk ba sain. Ngi don la ka jong ka kolshor bad ki riti dustur. Kumba ngi burom ia ki riti dustur bad ia ka jingngeit jong kiwei ki jaidbynriew ngi kyrpad ruh ia ki ba kin ym pynthut ia ka kolshor bad ia ki jingleh jingkam tynrai ki jong ngi.”

Nalor kata ka Kong Ampareen kala ong ba ka Meghalaya ka don iala ka jong ka kolshor kaba kyrpang bad kumta ym dei ban ailad ba ki bor kiba nabar ba kin wan ban tuklar bad pynthut.

Ka la ong ruh ba kano kano ka jingpyrshang ban pynthud ia ka shongsuk shongsain ka dei ka bym lah satia ban pdiang bad ka ain ka don ban shim ia ki sienjam bad leh ia kaba donkam.