Sangeh iakhih shipor ka JSM bad ka bor shnong Khanduli ban kynriah iaka khyrdop ka KACC

Syllad | The Rising MeghalayaJuly 13, 2023

Ka Jaintia Students’ Movement (JSM) bad ka bor shnong Khanduli kila rai ban sangeh shuwa shitaiew iaka jingiakhih dawa pynkynriah iaka khyrdop lum khajna ka Karbi Anglong Autonomous Council (KAAC) ha Khanduli.

Ia kane ka rai ka JSM bad ka Khanduli kila shim hadien ka jingiakren bad u DC West Jaintia Hills District uba la kular ban shimkhia ban iakren ban pynbeit ia kane kam haka sngi Palei..

U Waheh Shnong Khanduli Yooshida Nongspung ula ong ba ula kular ban shimkhia katba lah ban iakren ia kane ka kam ban kynriah iaka khyrdop ka KAAC. Ula ong shuh shuh lada ka bor district ne ka sorkar kim lah ban kynriah ia kane ka khyrdop kin shim da kiwei ki lad jingiakhih ba tyngeh.

Shuwa kane ka jingiakren, ki dkhot bad nongialam ka Jaintia Students Movement (JSM) bad ki nongshong shnong Khanduli kiba la palat 200 ngut kila ioh ban tur puk ha DC hadien ka jingiaid paidbah kaba la pynlong na Petrol Pump (Wah Gate), Iawmusiang haduh ha phyllaw ka JHADC.

Hakhmat ka khyrdop jong ka JHADC la pynlong iaka jingialang lyngkot bad la ioh ka jingkren na u Waheh shnong Khanduli Yooshida Nongspung, u Chairman shnong Khanduli N. Challam, ka Kong Darapbiang Mulieh longkmie Khanduli, u Pyrkhat Pyrphet, u working president JSM Western Region bad kiwei kiwei ki nongialam ka JSM.

U Waheh shnong Khanduli u Yooshida Nongspung ula ong ka Dorbar shnong Khanduli ka pynrem jur ia u CEM JHADC bad iaki MDC ba kim shimkhia ban iakren halor kane ka jingeh jong ka shnong Khanduli kaba la pynlong iaka KAAC ban buh iaka khyrdop khrong khajna haduh u pud ka Meghalaya.

Haka juh ka por u Waheh Shnong ula iaroh ia u DC bad SP ka West Jaintia, kiba kloi ban hiar sha Khanduli bad iakren ruh bad ki bor pyniaid District jong ka Karbi Anglong bad pynbiang iaki bor pahara haka shnong Khanduli.