Sangeh pynlang ñiut ka Jowai Municipal Board na sor Jowai, mih pyrshah ka KSU ba lehsih ha Mynkjai

Syllad | The Rising MeghalayaMarch 19, 2021

Mynta ka sngi ka Jowai Municipal Board (JMB) kala rai ban sangeh ban pynlang ñiut na baroh kawei ka sor Jowai hadien bala mih ka jingpyrshah kaba jur na ka Khasi Students’ Union (KSU) bad ki shnong ba marjan ka jaka theh ñiut ka Jowai kaba don ha Mynkjai.

Ka JMB kala pynmih da ka notice ban pyntip paidbah ba kan sangeh ban lum ban lang ia baroh ki ñiut kiba mih na Jowai kynthup na ki iew ki hat naduh lashai ka sngi 20 tarik Lber 2021 tad haduh bala pynbna da kumwei.

Ka daw ba sangeh ka JMB ban lum ñiut ka dei hadien bala mih ka jingpyrshah na ka Khasi Students’ Union (KSU) Mupyut Unit, KSU War War Jaintia Circle bad ki shnong ba marjan kiba kynnoh ruh ba ki trok JMB bad ki trok ka JHADC kila leh torti haka rukom theh ñiut ha katei ka jaka pynlang ñiut ha Mynkjai.

Shuh shuh ka KSU kala mih paidbah ban pynpaw ka jingpyrshah haka sngi Thohdieng kala khang lad iaki trok ka JHADC ban bret ñiut ha katei ka jaka.

U Laitphar Syngkrem president KSU War Jaintia Circle ula ong haka facebook post jong u “Phet iamrem ki briew jong ka JHADC ha ryngkat ki truck bret ñuit ba khanglad ka KSU Moopyut unit bad KSU War Jaintia circle ha ryngkat ki paidbah jong ka shnong Moopyut ban bret iaki ñuit haki jaka ha wah Mynkjai.”

Ka KSU Mupyut haka jingialam u president Stanly Dkhar bad secretary Yophi Khyriem ha ryngkat ka jingiadonlang ki nongialam ka War Jaintia Circle u president Laitphar Syngkrem, general secretary Lurman B. Talang haka 8 tarik une u bnai kila leit ban ujor ha u Deputy Commissioner, West Jaintia Hills District halor ka torti ka rukom theh ñiut haka jaka pynlang ñiut ha Mynkjai.

“Ki paidbah kila ud kila nam halor kane ka jingleh bym suidniew ki bor district wat la kane ka jaka ka ktah iaka mariang bad ka koit ka khiah u briew bad ki mrad mreng. Baroh ki kali ba wan theh ia ki nuit ki la shu theh harud surok bad khlem don kano kano ka lad ban iada iaka jingjaboh ka mariang bad khuid ka suba ka sawdong sawkun kane ka jaka pynlang ñiut ha Mynkjai,” la ong ka KSU.

Ka KSU kala ong ba ka tdem bad ka jingsma iwtung kaba mih na kane ka jaka kala ktah iaki nongshong shnong bad ki shem shitom ban ring mynsiem bad kala kynthoh ruh kumno ia kane ka jaka theh ñiut la buh ha ki jaka ba jan na ki shnong briew. Nalor kata ka KSU kala ong ba kane ka jaka theh ñiut kala pynsniewduh iaka jingitynnad ki lum ki wah bad la pyndap da ki jaboh jabain ba har rukom.

Ka KSU kala byrthen ba lada ka bod synshar district, ka JMB kim shimkhia ban shna ia kane ka jaka theh ñiut haka rukom kaba dei kaba iadei bad ka mariang bad bym ktah iaka koit ka khiah u briew kin khang syndon ban bret ñiut ha kane ka jaka.