Bteng ka jingsangeh thied bad shoh doh masi ka KJBWA
SHILLONG: Ka Khasi Jaiñtia Butcher’s Welfare Association (KJBWA) ka la pynbna ba kan iai bteng ban sangeh thied bad shoh doh masi katba ka sorkar kam pat lah ban pynbeit ia ki jingdawa ka KJBWA ban khanglad ia ka jingshalan beaiñ ia ki masi sha Bangladesh.
Ka KJBWA haka sngi Saitjaiñ kala lum ia ka jingialang ban iakren sani bha halor ka jingiakhih kaba la neh lai taiew lynter bad hadien ba la ïohsngew iaka sur jong ki dkhot kiba la wan poi na kylleng ka Ri Khasi-Jaintia bad hadien kala shim biang ia ka rai ban bteng ia ka jingiakhih jong ki.
![](https://www.syllad.com/wp-content/uploads/2024/09/JIT-Vacancy-823x1024.avif)
U Bah Generous Warlarpih President KJBWA u la ong ka seng ka la shim ia ka rai ban bteng ka jingiakhih bad ha kajuh ka por la pynpaw ba donkam noh ia ka ïew masi ba thymmai ban don noh ha Byrnihat namar ka ïew kaba don mynta kam long ka jaka kaba biang ban khaïi masi.
U la iathuh ba na ka liang ka sorkar ha ka jingiakynduh bad u Bah Prestone Tynsong uba dei u Symbud Myntri Rangbah u la bthah ban wad ia ka jaka ba ki nongshoh doh ki sngew ba ka biang na ka bynta jong ki bad na ka liang ka sorkar kan ai ka jingia treilang ban phah ia ki doktor sha kata ka jaka. “Ngi la ioh ia ka jaka bad hapoh kane ka taiew ngin pynthikna noh iaka bad lada lah ban pynkynriah ia ka ïew masi na Khanapara sha Byrnihat kan khanglad ia ki briew kiba shim kabu bad ban shalan beaiñ ïaki masi,” u la ong Bah Warlarpih.
Leave a Reply