Santosh Trophy: Yn iakynduh ka Meghalaya iaka Services ha ka quarterfinal

Syllad | The Rising MeghalayaDecember 27, 2024

Hadien ba ka la lah ban kiew shakhmat na ka jingsdang kaba suki haduh ban da pynkut ia ka Group B jong ka wat ba khatduh jong ka lympung ialehkai phutbol Senior Men’s National Football Championship jong ka Santosh Trophy 2024-25, ka Meghalaya mynta kan iakhun pyrshah ia ka Services kaba dei ka kynhun lahduh jong ka samoi ba la dep ha ka quarterfinal ka ban long ha ka 27 tarik Nohprah ha Hyderabad.

Kane ka jingialehkai ka ban dei ka sien kaba saw bad kaba khatduh jong ka quarterfinal kan long ha madan Deccan Arena ha Hyderabad ha ka por 7:30 janmiet.

Ka Services kaba la jop ia kane ka lympung haduh hynniew sien ha kine ki snem kiba la leit noh, ka la wan ha ka kyrdan kaba lai ha ka Group A, kata hadien ia ka West Bengal bad ka Manipur bad hakhmat ia ka Jammu bad Kashmir.

Ka Kerala ka la wan hakhmat ia ka Meghalaya ha ka Group B, katba ka Delhi bad ka Odisha ki la wan ha ka kyrdan kaba lai bad kaba saw.

Ka Meghalaya ka la khur tang 1 poin na ki ar tylli ki jingiakhun ha ka kynhun ba nyngkong shwa ban jop ia ki ar tylli ki jingiakhun ba bud ban rung sha ka knockout bad ban tynjuh ia ka jingkhlain jong ka pyrshah ia ka Odisha ha ka jingiakhaid kaba khlem don ba ioh thep kol. Ki rangialehkai ba la ialam da u Bah Hering Shangpliang kum u Coach kin kwah ban pynkylla kham bun ki lad ban thom shakhmat kiba ki thaw ha ka liang pyrshah hynrei kin kwah ruh ban pynjlan ia ka rekod babha jong ki ha ka liang ba shadien.

Katba ka Services ha kawei pat ka liang ka la jop pyrshah ia ki laitylli ki team kiba don ha ka group jong ka hynrei ka la shah rem noh ha ka Manipur bad ka West Bengal.

Ka Services ka la jop ia ka Meghalaya ha ki jingiakhun ba dang shen jong ki ha ka Santosh Trophy, hadien ba ki la jop ha u snem 2022-23 bad 2023-24. Baroh ar tylli ki jingialehkai ki dei ha ka kynhun, hynrei katba ki arliang mamla ki tip ba kan ym don ka lad kaba ar lada ki shah rem ha ka jingialehkai knockout lashai ka sngi 27 tarik Nohprah 2024.