Sar ka jingpang khlam sniang ASF iap 173 tylli ki sniang ha Lamin

Syllad | The Rising MeghalayaJuly 31, 2020

Haduh 173 tylli ki sniang kila iap naka khlam sniang kaba la tip kum African swine fever (ASF) haka shnong Lamin, Amlarem Sub-Dvision, West Jaintia Hills District.

U ma Golden Gashnga, Waheh Shnong Lamin ula iathuh ba kane ka jingsar kane ka khlam African swine fever kala jia naduh u bnai Jylliew bad mynta kala saphriang haka shnong Sohkha Shnong ka shnong kaba marjan bad ka Lamin.

“Haduh mynta ki don haduh 173 tylli ki sniang kiba la iap na kane ka jingpang khlam sniang,” ong u Waheh Shnong Lamin.

U Deputy Commissioner, West Jaintia Hills District u Garod LSN Dykes ula pynthikna ba kane ka jingiap ki sniang ka dei naka khlam African swine fever (ASF) bad la ioh iaka report dangshen.

Haba pyrshang ban wad bniah naka District Animal Husbandry and Veterinary Officer, West Jaintia Hills kala ong ba kam lah ban kren halor kane namar ba ym shym ai jingbit iaka watla ka dei ka khlieh jong ka tnad hapoh district.

Ka khubor kaba iohlum shuh shuh ba kane ka khlam la suba kala pur sha Satpator bad kiwei kiwei shnong ha khappud India Bangladesh.

Ban iakhun iaka jingsaphriang jong kane ka khlam pule shuh shuh ia kane ka link: http://megahvt.gov.in/miscellaneous/ASF_KHASI.pdf