Satah ki jaboh plastic kylla dur ka wah Myntdu

Syllad | The Rising MeghalayaApril 30, 2023

Ka wah Myndtu kaba la tip kum ka tawiar ka takan ne ka nongda nongker haka ktien phareng ka mut Guardian Angel’s , pynban ka jingkylla dur jong ka ha kine ki sngi, ka buh iaka jingma ia u khun bynriew uba pyndonkam iaka ban dih ban bam bad ban sait ban khlieng khamtam ki bynta ba sharum jong ka.

Ka Wah Myntdu ka dei ka wah kaba bsa um iaka sor Jowai baroh kawei bad ban bsa um ruh ia ki pynthor ki halii ba tuid kane ka wah bad pynim jakpoh ia kiba bun na ki dohum dohpnat, hynrei ka jingjur ka ka jingngut bad jingpyntuid iaki jakhlia naduh ki bitor plastic, ki jaboh plastic bad kiwei kiwei ki jakhlia na ki oh kynthup ia ka oh u briew ka buh jingma ia kane ka wah.

La sakhi ba tang hadien ba wan ther u slap haka sngi Saitjain jong ka taiewia kane ka wah la tap iaka da ki jaboh plastic ba har rukom bad ka buh jingma ia u khun bynriew ban pyndonkam ia ka um n aka wah Myntdu.

Lah ban pynkynmaw ba kawei ka longkmie kaba pule bniah ia ka Wah Myntdu, ka Dr. Wansah Pyrbot, haka thesis jong ka-Assessment of Water Quality affected by urban waste water and coal mine seepage and the impact of aquatic plant” kala lap ba ka Wah Myntdu kam biang shuh ia ka nongshong shnong ka Jowai bad ki shnong marjan ban pyndonkam iaka kum ka um bam um dih namar ba kala jakhlia ha baroh shilynter na ka jingtuid ki jaboh jabain na ki shnat ka wah  katba nangmih ki sngi.

Katkum ka jngwad bniah, la lap wat ki jingthung jingtep kiba don ha shilynter ka wah Myntdu kim lah shuh ban pynkhuid iaka wah namar bala jubor ka jingtuid ki jakhlia bad ka um kala kylla acid.

Ka Wahumkhrah bad Umshyrpi ha Jylla kala ioh iaka nam ba jakhlia tam, ka jingma ka ap sa ia ka wah Myntdu ban ioh ia kane ka nam bad kan long ka um kaba ym don jingim.

Ka Jaintia Students’ Movement kala pynpaw iaka jngsngewkhia halor kane ka jingkylla dur ka wah Myntdu bad ka khot ka wer ia baroh kiba don bynta ban kyndit noh bad ban ai ka jingiada ia kane ka wah.