Saw bnai dei ban pyndep iaka jingtohkit pyrshah iaki khynnah kiba leh ia ki kam beaiñ

Syllad | The Rising MeghalayaSeptember 3, 2020

Ka Sneha PD Sangma, JMFC, ka Principal Magistrate, West Jaiñtia Hills District kala ong ba hapoh saw bnai dei ban pyndep iaka jingtohkit ia kino kino ki khynnah kiba leh iaki kam beaiñ.

“Ka Juvenile Justice Act 2015 ka kdew shai iaki lad jingiada iaki khynnah kiba leh bakla pyrshah iaka aiñ. Haka Juvenile Justice Act ym lah ban pyndonkam iaka ktien kem (arrest), hynrei dei ban pyndonkam da ka ktien bat (apprehend) bad ym lah satia ban khum ban teh iaki khynnah da ki kynjri (handcuff) bad haba tohkit iaki khynnah dei ban ai jingtip iaka District Child Protection Unit bad ban rah hakhmat ka Juvenile Justice Board (JJB),” la ong ka Sneha haba kren kum ka riew shemphang haka jingiathir jingmut ki pulit bad ki nongthoh khubor haka prokram kaba la tip kum ka Interactive Session on Juvenile Justice (Care and Protection of Children) Act, 2015.

Ia kane ka jingai jinghikai la pynlong ha conference hall ka ophis jong u Superintendent of Police West Jaintia Hills District haka sngi Palei.

Ka Sneha kala ong “kaba kongsan dei ban pynthikna iaka rta jong u/ka khynnah bad lada artatein iaka rta jong ki khynnah dei ban ioh jingbit naka JJB ban pynthikna iaka rta katkum ki kyndon jong ka aiñ. Kum ki Pulit kiba tohkit ka donkam ban ngam jylliew ban wad iaka tynrai bin pa bin iaka jinglong jingman u/ka khynnah bad kaei ka daw kaba pynlong ia/u ka ban leh iaka kam sniew.”

Kala ong ba ha kane ka aiñ ka donkam ban ai jingiada iaki khynnah la ki long ki lanot ne ki nongleh kam sniew khnang ban ioh pynbeit bad iasyllok bad ban ioh pynkylla iaka jinglong jong ki ba kin ioh iaka lawei kaba bha kaba miat.

Hashuwa ban sdang ia kane ka jingiathir jingmut la don ka jingialang kaba lyngkot kaba pyniaid da ka Deputy Superintendent of Police (Crime), ka Kong Crescency Lyngdoh.

La ioh jingkren na u Superintendent of Police West Jaintia Hills Bikram D Marak uba la ong ba da ka jingkiew ki kam sniew pyrshah iaki khynnah, ka donkam bha ia baroh ki ophisar pulit ban ioh ki jinghikai bad ban iaid katkum ki kyndon jong ka aiñ khnang ba ki khynnah kin ioh ka lad jingiada.

La iadonlang ha kane ka jingiaphylliew jingmut naduh ki dkhot ka JJB ka kong V. Hadem bad ka kong A Passah ka ophisar kaba la shongthait ha ryngkat u Additional SP B Chetri, MJ Marngar, Dy. SP Headquarter bad ki Officer Incharge jong ki thanad na kylleng ka West Jaintia Hills District.