Saw bnai khlem tulop, mih ki nongtrei sha surok ban pyrshah iaka kharkhana dewbilat ha East Jaintia Hills

Syllad | The Rising MeghalayaMay 20, 2020

Ki nongtrei jong kawei ka kharkhana dewbilat ha Elaka Narpuh kila mih sha surok ban pyrshah iaka bor pyniaid jong ka kharkhana dewbilat ka JUD Cements Ltd. kaba sain dewbilat ha ka Wahiajer, East Jaintia Hills District na ka daw ba kim ioh tulop la saw bnai mynta.

Ka khubor kaba iohlum ka iathuh ba kine ki nongtrei kiba haduh 60-70 ngut tang na ka shnong Wahiajer nalor kiwei ki shnong ba kynthup iaka Jowai, War Jaintia kila mih sha surok ban pyrshah iaka bor pyniaid ka kharkhana ban dawa tulop kaba la kot la saw bnai mynta naduh u bnai Kyllalyngkot haduh Iaiong.

Kine ki nongtrei kila mih sha surok ban pyrshah bad ban dawa iaka tulop naka kompeni ban siew iaka tulop mardor ba kin ioh pyndap pynbiang iaka jingdonkam ha iing ha sem.

Uwei u nongtrei katei kharkhana ula ong “Baroh ki nongtrei kila shah ktah bha hadien bala pynjari iaka lockdown ha ri ban iakhun pyrshah iaka khlam COVID-19. Ka kompeni ruh kala leh bym suidniew iaka jingud jingnam jong ngi bad mynta tang ban thied khaw bad kiwei ki jingdonkam ha iing ruh ngim ioh shuh bad dei namar kane ka daw ngi la mih sha surok ban dawa na ka kompeni ban ai noh iaka tulop kaba dei ka hok jong ki.”