Saw tylli ki case rejiser ki pulit iaki sengbhalang ba khynra kot sla iaki nongtrei bar jylla; ong u CM Conrad

Syllad | The Rising MeghalayaJuly 11, 2024

U Myntri Rangbah ka Jylla u Conrad K Sangma ha ka 10 tarik Naitung u la ong ba ki pulit ki la rejister haduh saw tylli ki case pyrshah ia ki kynhun sengbhalang namar ka jingpynlong ia ki jingkhynra kot khynra sla kaba beain pyrshah ia ki nongtrei bar jylla ha ki jaka pyntrei bapher bapher ha ka Jylla.

Kane ka jingpynpaw jong u Myntri ka la wan long ruh hadien ba ka Khasi Students’ Union (KSU) ka la pynjur ia ki jingkhynra work permit shibynta ban banbor ia ka Sorkar ba kan pyntreikam ia ka Inner Line Permit (ILP) bad ia ka Meghalaya Residents Safety and Security Act (MRSSA), 2016 ban tehlakam ia ka jingwan rung khyrthep ki briew kiba na bar sha kane ka Jylla.

Haba kren sha ki lad pathai khubor hadien ka jingialang Kynhun Myntri, u Conrad ula ong, “Ym shym la aibor iano iano ruh ban khynra ia ki kot ki sla. Ki don ki jingjia ha kaba ki kynhun sengbhalang ki la leit ban khynra ia ki kot ki sla jong ki nongtrei bar jylla, hynrei kane kam long katkum ka ain. Kumta kine ki kynhun seng ki la iaid ha ka lynti kaba bakla jong ka ain,” ong u Sangma.

Da kaba ong ba ka Sorkar kan shim ia ki jingpynshitom pyrshah ia kiba kum kine ki jingjia, u CM u la ong, “Ki pulit ki la rejister haduh sawtylli ki case pyrshah ia ki kynhun sengbhalang naduh kine ki khyndiat sngi ba la dep.

“Ym donkam satia ia ka Work Permit ia ki nongtrei bar jylla, hynrei dei beit ban register bad ka tnad Labour, bad ia kane la leh na ka bynta ka jingshngain ka jong ki,” u la ong.

Nalor kata u CM u la ong ruh ba ki kontraktor kiba aikam ia kine ki nongtrei bylla bar jylla ki hap shim ia ka jingkitkhlieh ban pynrung kyrteng iala ki nongtrei. Ki don ruh ki kyndon bad ain kuna ia ki kontraktor lada kim leh ia kane ka bynta.

Haba jubab halor ki jingkynnoh jong ki sengbhalang, u CM u la ong ba ka jingkylli kaba iadei bad ka jingpyntreikam ia ka Inner Line Permit (ILP) kam mih satia namar ia kane ka kam la dep mynjur da ka iingdorbar thaw ain ka Jylla bad na ka liang ka Sorkar Jylla ka dang iai bteng ban buddien bad ka Sorkar Pdeng.

Halor ka jingdawa ban pyntreikam ia ka Meghalaya Residents Safety and Security Act (MRSSA), u Conrad u la ong ba u Lat ka Jylla u la phah ia kane ka Bill sha ka Sorkar Pdeng lyngba ka Ministry of Home Affairs (MHA), hynrei kaba la pynphai pat ia ka ha ryngkat ki jingai jingmut halor ka jingdonkam ban pynkylla ia ki katto katne ki bynta.

Halor kane ka bynta u Conrad ula ong ba ki kam kila iaid ha ka ban pynkylla ia ka, ban pynbiang ia ki jingdonkam bad ka jingpynsngew jong ka Sorkar Pdeng.