Sawa jam ka jingdawa pynkylla iaka State Anthem, dawa pynbeit ka Synjuk Waheh Shnong Ri Jaintia
Ka jingdawa ban pynkylla ne pynbeit thymmai iaka State Anthem kala sawa jam ha rilum Jaintia. Kane kala wan jia long hadien bala leh klet iaka ktien Pnar/Jaintia bad la pynrung tang iaka ktien Khasi, Garo bad ka English haka sur jingrwai.
Kane kala pyndiaw iaka mynsiem jong u paid nongshong shnong ka Rilum Jaintia watla niew iaka kum kawei na ki major tribe ne ka jaidbynriew kaba hakhmat naduh bala ioh iaka Jylla kaba pura.
Ka Synjuk Waheh Shnong Ri Jaintia haka sngi Nyngkong kala dawa na ka sorkar Jylla ba kan pynbeit thymmai iaka jingrwai ‘State Anthem’ da kaba pynrung lang iaka kyntien Jaintia kumba la pynrung iaka kyntien Khasi bad Garo.
U Bah Army Lipon president Synjuk ki Waheh Shnong Ri Jaintia ula ong kum ka synjuk ki diaw ka mynsiem haba iohi iaka jingbym kynthup lang ka sorkar iaka kyntien Jaintia haka ‘State Anthem’ bad kane ka jingleh klet jong ka sorkar kan wanrah iaka jingsngew bad ktah ia ki nong Jaintia.
Ula pynkynmaw ba ka Meghalaya ka ioh iala ka Jylla lajong ha u snem 1972 da kaba phiah iaka Khasi Jaintia bad Garo.
“Haba iaka kyntien Khasi bad Garo la kynthup hapoh ka Meghalaya State Anthem ngi kwah iaka sorkar ba kan pynrung sa iaka kyntien Jaintia khnang ban im ka jaitbynriew,” la ong u Bah Army Lipon bad kyntu iaka sorkar ban pynkylla ban pynbeit thymmai ia kane ka sur jingrwai Anthem ka Jylla.
Ha kawei pat ka liang u pynpaw ka jingkmen ban iohi ba haka Meghalaya State Anthem la pynmih tang iaki dur haka por ba pyndep iaka lehniam leh rukom da ki khun ka Raij Jowai haka por ba ki hiar hapoh ka Aitnar. Hynrei ka kyntien Jaintia kaba la khmih lynti ba kan mih ka khlem mih hynrei la mih pynban da ka kyntien phareng.
Khnang ba kan long salonsar bad ba ka Jaintia kan ioh bynta lang hapoh ka imlang sahlang bad ruh hapoh ka jylla Meghalaya, ka Synjuk ka kyntu iaki 7 ngut ki MLA ka rilum Jaintia bad ruh ia u Myntri ka tnad Art & Culture ka sorkar Jylla ba kin pynbeit thymmai da kaba aibhah aibynta lang iaka nong Jaintia namar lada ka long kumne ka long kumba pyniap syndon iaka kyntien Jaintia, ula ong shuh shuh.
Ngi pdiang ia kino kino ki kyntien hynrei ka kyntien Jaintia dei ban tip ka pyrthei namar ka long kyrpang, la ka long haka niam ka rukom bad ka kolshor. Kumta ngi kwah ba ka sorkar kan pyrkhat bha bad kan ai ka bhah kyrpang lym kumta ka Synjuk kan pyrkhat da kawei ka lynti bad khnang ban lait na kino kino ki kam kiba long pyrshah iaka sorkar bad ia kino kino ki jingjia kiba sngewsih kiba ktah iaka ri bad ka jaitbynriew ka Synjuk kala kyrpad katba lah ban pynbeit thymmai namar ka por ka dang biang iaka sorkar ba kan pynbeit iaka jingduna jingbakla.
Facebook
Instagram
Youtube
Twitter
Ka Ab –
Haba ka Ktien Khasi kala dei lypa ka ktien pdeng naka bynta ka bri u Hynniewtrep kaba mut ka ktien kaba ieng lut na ka bynta ki sub- tribe kata u Pnar, u War, u Khynriam, u Bhoi, u Maram bad u Lyngngam, te balei keiñ ba hap ban da bhah kyrpang iaka ktien tang ia uwei na kine hi.
Ngi donkam ka jingsngewthuh ba ngi baroh ngi dei kawei ka jaitbynriew KHASI bad ngi pyndonkam beit iaka ktien pdeng daka ktien Sohra hi.
Hato, lada u Bhoi ne u War ne u Maram ne u Lyngngam kin ia mih ban phah kynthup iala ki ktien jongki, hangta lah mih ka jingiapait-jingiapra hapdeng jongngi kum kawei ka jaitbynriew KHASI. Ka jingkyntu ka long ba ngin pdiang hun beit iaka Ktien Khasi kumba kala ju long ka ktien pdeng naka bynta jongngi lang baroh.
“Tylli ngin ieng kawei ka jaitbynriew KHASI”
Khublei