Sawa jam ka sur jingdawa pynbeit thymmai iaka Reservation Policy haka sngi kut ka Behdieñkhlam ka Seinraij Jowai

Syllad | The Rising MeghalayaJuly 9, 2023

Ki Saw Sngi Lai Ia ka lehniam Behdieñkhlam- kaba ju pynlong man la ka snem da ka Seinraij Jowai ban kyrpad kyrpon na u nonbuh nongthaw ban ioh iaka jingkyrkhu kyrdoh ban lait naka khlam ka ngoh bad ban ioh ia u khaw u kba ba dap biang u thiar bad ban beh iaka sniew ka smeh ka imlang ka sahlang kala poi noh sha kaba kut haka 9 tarik Naitung ha Aitnar.

Da ki hajar ngut ki riewngeit Niamtre bad ki paidbah na kylleng kila wan ban sakhi ia kane ka Behdieñkhlam.

Ki kynrem ki lyndan kiba wan sakhi ki kynthup ia u Lat ka Jylla Phagu Chauhan, u Chief Justice Meghalaya High Court Sanjib Banerjee, u Myntri Sorkar ma Kyrmen Shylla bad u MLA ka VPP u Adelbert Nongrum nalor ki DC SP ka West Jaintia Hills bad ki ophisar sorkar na ki tnad bapher bapher.

Kane ka Behdieñkhlam ba saw sngi lynter kala iaid beit iaid ryntih hapoh ka jingpyniaid ki nongialam kiba kynthup ia u President OR Shallam, general Secretary ma Arwotki Sumer bad ki shakri niam naduh u Dolloi Elaka Jowai u ma Puramon Kynjing u khlieh jong ka niam, Sangot, Langdoh, bad kiwei kiwei kiba don bynta ban pyndep iaka ka niam ka rukom.

Ka bynta kaba kongsan bha jong ka Behdieñkhlam ka dei ka jingpynpoi iaki rot ha pung Aitnar da ki Kmai Raij kiba kynthup iaka Iongpiah, Dulong, Panaliar, Loomkyrwiang, Chilliangraij, Loomiongkjam, Tpep-pale, Iawmusiang nalor ka Ummulong and Shillong Seinraij bad ka Seng Khasi Kmie.

Ha une u snem ka rong/rot ba la wanrah ka Iawmusiang ka wanrah iaka khubor kaba ka jylla baroh kawei kala khih win. Kane ka khubor ka dei halor ka Reservation Policy bad ka Roster System ne ka bhah ioh kam ba dka jingpynbeit tyntih iaka jingthungkam. Ka khubor ka ong bun byllai ki nongthep kam kiba duh iaka kam namar kane ka policy, ka ong ruh ba dei ban pynbeit thymmai iaka resolution jong u snem 1972.

Kawei pat ka khubor kaba wanrah da ka Loomkyrwiang ka thew halor ka jinglong kynrad ka mobile haka pyrthei. Ka khubor ba wanrah ka Umshangiar ka kren shai ba ka um ka dei ka jingim bad ka shong pat ha u khunbynriew ban tyngkai iaka.

Kiwei kiwei ki rot ki rah iaka khubor halor ka jingsniew ka jingkyrni haka jingdih pynbuiad bad ka rot ka Seng Khasi Kmie ka ong baka thymmei, ka tynrai, ka long kawei kajuh, kaba tip kut tip kha, tip briew tip blei bad im ka Niam Khasi Nimatre Im ka Jaidbynriew.

Ka lehniam Behdieñkhlam haka sngi pynkut, la sdang ïaka da ka lehniam ‘Kynting Khnong’ ha ïing sah ka Langdoh bud pat sa ka ‘Bam Tyngkong’.

Hadien pat la pyndep sa ïaka lehniam ‘Shoh Thyndai’ ban sympat ha man ki tnum ïing da ki Deiñkhlam katkum ka jingngeit ban beh ïaki ksuid ki khrei, ka pang ka shitom bad ka sniew ka syar baroh na ki ïing ki sem.

Ïa kine ki jinglehniam la pyndep da ki da ki nongialam niam kynthup ïa u Dolloi, ki Sangot, u Chutia, nalor u Pator, u Langdoh bad ki riew rangbah ka Raij.

Katba ha ka nohphai sngi la pyndep ïaka bynta ba kongsan jong ka lehniam Behdeiñkhlam ha Aitnar haka pung ktieh ba kyntang, ha kaba hangne ki riew rangbah hapoh ka jingïalam u Pator kila pynlong ïaka nguh ka dem ha Syiem Aitnar.

Hadien nangta bud pat saka jingwan poi ka ‘Symbood Khnong’ bad ‘Khnong Blai’ ha kaba ki khun ka Niamtre kila hiar ban knieh ioh ktah bad la ngeit ban ioh iaka koit ka khiah bad ka ro ka par.

Mynta u snem ki don haduh 13 tylli ki Rot kiba la wanrah sha Aitnar, hadien ba la wan poi lut ki Rot la wan hiar ïaka ‘Khnong Blai’.

Haka janmiet pat la pyndep ïaka lehniam Datlawakor hapdeng u Langdoh uba ïeng na Pynthor Wah pyrshah ïa u Sangot Paswet uba ïeng na Pynthor Nein ha kaba la jop da u Langdoh bad katkum ka jingngeit niam ha une u snem u khaw u kba un bha sha ka Pynthor Wah.