Sdang biang ka jingiakhih ka JHTOA bym ioh kit dewbilat na ki karkhana

Syllad | The Rising MeghalayaApril 30, 2024

Ka seng ki trai trok hapoh ka lama Jaintia Hills Truck Owner Association (JHTOA) kala sdang iaka jingiakhih ba khlem buh por da kaba bat bad pynphai ia kumba 30 tylli ki trok kit mar jong ki karkhana pynmih khyndew bilat.

Kane ka jingiakhih jong ka JHTOA kadei hadien ka jingshah thok shah shukor kaba man ka por haka synjuk ki karkhana pynmih khyndew bilat kiba don haka thain East Jaintia Hills District.

Haba iakren bad u President ka JHTOA u Bah Biangshwa Shylla ula ong ka synjuk haka jingshong jingialang kyrkieh haka 29 tarik Iaiong ha ophis treikam jong ka JHTOA kaba don ha Tuber Tahkhniang, East Jaintia Hills da kawei ka sur ka la rai ban sdang noh iaka jingiakhih kaba khlem buh por.

“Haka sngi sdang jong ka jingiakhih ngi la bat bad pynphai ia kumba 30 tylli ki trok kiba dei jong ki saw tylli ki karkhana pynmih khyndew bilat kynthup ka Star Cement, Dalmia, Amrit bad Green Valley”, la ong u Bah Shyla bad bynrap ba kane ka jingiakhih kan dang bteng nangne shakhmat.

Ula pynkynmaw ruh ba dang shen ka la don ka jingialang hapdeng ka synjuk ki trai trok, ka synjuk ki karkhana pynmih dew bilat bad ki bor synshar District jong ka East Jaintia ban pynbeit iaka rukom kit rukom bah bad na ka liang ka synjuk ki karkhana pynmih dew bilat ruh ki la ai ka jingmynjur ban ai bhah ban kit 40 tylli ki trok haka shi sngi hynrei ha kine ki shibnai kitei ki 4 tylli ki karkhana kim bat la kular.