Sdang biang ka jingiakhih ka MUPSTA ban dawa kyntiew kyrdan deficit iaki skul adhoc

Syllad | The Rising MeghalayaFebruary 26, 2022

Ka synjuk ki nonghikai Meghalaya Upper Primary School Teachers Association (MUPSTA) haka sngi Thohdieng kala sdang biang iaka jingiakhih jong ka da kaba shong kyllaiñ mynngor ha baroh ki district headquarter ban dawa na ka sorkar ban kyntiew kyrdan deficit ia ki 844 tylli ki skul adhoc ha Jylla.

Ha Jowai ia kane ka jingiakhih la pynlong ha madan Ladthadlaboh (Daimasi) Jowai bad la wan ban iashimbynta da ki nonghikai na kylleng.

U Ma EG War, Organising Cum Publicity Secretary ka MUPSTA Central Body haba kren sha ki lad pathai khubor ula ong, kane ka jingïakhih ka long shibynta ban pynbor ïaka sorkar ban pynurlong noh ïaki jingdawa ba ka synjuk ki nonghikai skul ka la dawa naduh u snem 1994 ban kyntiew deficit noh ïa baroh ki 844 tylli ki Adhoc Upper Primary School kiba don haka jylla baroh kawei.

“Na baroh ki nongtrei, ki nonghikai kidei ki nongtrei kiba shem jynjar bha nalor ba duna ka jingsiew, hynrei ki ïoh tulop ruh shisien lai bnai. Haba ïanujor ïaka dor ka mur kaba mynta ka long kaba eh ïaki nonghikai ban pyndap ïaki jingdonkam bad jinglut jingsep ki khun ki kti kumjuh ka ïing ka sem”, la ong u Ma War.

Ula bynrap da kaba ong, ba kum ki nonghikai ngi don ka jingsngewlehraiñ ban mih madan ban dawa ïaka hok namar ïaki la tip kum kita ki nongsaiñdur, ki nongtei ïaka ri bad ki nongkit nongbah haka imlang sahlang hynrei haba ka jingsiew ka duna ym banse, hap ban mih surok ban dawa ïaka hok kumba ïoh lem kiwei ki nongtrei sorkar.

Ula ïathuh, ha baroh kawei ka Jylla ki nonghikai ki don haduh 3376 ngut katba ha West Jaintia Hills District la don 140 ngut ki nonghikai na ki 35 tylli ki Upper Primary School. “Ngi la dawa ruh na ka sorkar ban ai ka juh ka jingsiew iaka juh ka kam,” ula ong u Ma War.

Ha kane ka kynti, ka MUPSTA kala byrthen ba kan nang pynjur iaka jingïakhih lada ka sorkar ka dang leh kuman ban pynioh iaka jingdawa ha baroh 12 District haka Jylla.

Shuh shuh u Ma War ula pynkynmaw ïaki jingïaid lynti ka synjuk bad ki jingleh klet jong ka sorkar ïaki jingdawa ba shongnia jong ka synjuk.

Ula pynkynmaw ruh ba ha u snem 2018, u Myntri Rangbah ka Jylla u Conrad K Sangma ula kular ban kyntiew deficit noh ïa kitei ki skul haka Teachers Conference kaba la long ha Asanang Tura, West Garo Hills hynrei haduh mynta ym pat ïohi dak eiei ruh em ba ka sorkar kan shimkhia ïa kane ka mat jingdawa jong ki nonghikai skul.

Nalorkata ula pynkynmaw ruh ïaka jingleit ïa kynduh ka synjuk nonghikai skul ïa u Commissioner Finance ha Secretariat ha u bnai Naiwieng 2021 ban twad jingmut ha ka jingïadei bad kane ka jingdawa hynrei ka jubab ba ula ai ka long ka bym sngewtynnad satia.