Sdang iaka ‘My City Campaign’, theh pisa ka sorkar sha ki shnong ban pynkhuid shnong

Syllad | The Rising MeghalayaMarch 10, 2024

U Myntri Rangbah ka Jylla, u Conrad K Sangma, haka 9 tarik Lber, ula sdang iaka ‘My City Campaign’ ka jingialap paidbah ban pynkhuid shnong. Ha kane ka juh ka sngi u la plie ruh iaka ‘Reimagining Streets’ ka sienjam na ka bynta ban wanrah jingkylla bad ban ai mynsiem iaki nongshong shnong ban iaid kjat bad shimbynta ruh haka jingpynkhuid shnong ha Dhankheti.

Haba kren haka jingialang pynkut ha Moreau Institute of Integral Training (MIIT) hadien ba lah dep pynkhuid shnong ha Dhanketi Parking Lot, u Myntri Rangbah u la ong ba ki don bun ki kynhun bapher bapher, ki riewshimet bad ki tnad bapher bapher kila leh iaki kam hala ka jong ka bor, bad kala donkam ban wanrah iaka jingiatreilang jong barohlang.

“Kane ka jingpynkhuid shnong kaba la sdang mynta ka sngi ka dei kaba ngi kwah ban leh manla ka lai bnai, namar ka imlang sahlang bad ka lariti kila ialeh ban pynkhuid iaki shnong”, u la ong u Conrad bad bynrap ba kiba bun ki shnong ki thaw kila leh ia kane ha la ka jong ka bor khlem kano kano ka jingkyrshan.

“Kane ka dei ka sien kaba nyngkong ba ka sorkar ka la shim iaka sien jam bad bei pisa ban pyntyllun iaka kam bad yn ai man la ka lai bnai na ka bynta kane ka kam,” ula ong u Myntri Rangbah. U la ong ruh ba kane kan sdang ha man la ki district headquarter bad suki suki kan leit sha man la ki shnong ki thaw.

U Myntri Rangbah u la ong ba kane ka buit kan long ym tang shisngi ban pynkhuid ia baroh kawei ka nongbah lane ka sor, hynrei ban wanrah iaka jingkylla haka rukom pyrkhat jong ki briew.

“Man ka por ba ngi pynkhuid ngi sdang ban sngewthuh ba baroh ngi don la ka bynta bad ai ba baroh u nongshong shnong ha ki sngi ba ka sorkar kam bei pisa ia kine ki jingpynkhuid shnong kin tynrong halade iaka jingkitkhlieh ba ngi pynthikna ban pynneh iaka sawdong sawkun kaba khuid bad kaba lait na ka jingbret ñiut,” ula ong u Myntri Rangbah

U la ong ruh ba ki samla ki don ka bynta kaba khraw ha kane ka campaign, bad lada ki samla ki sdang ia kane ka movement ne ka jingpynkhih paid kan pynkhlain bor bad ka thong hi ka long ban ialap ban pynneh iaka jingkhuid jingusba ki shong ki thaw.

Ha kaba ïadei pat bad ka jingthmu jong ka Reimagining Streets, ka dei ka sienjam ban pynlong ia ki surok ban iaid kjat bad ka thong ka long ban shna 10-15 km ki lynti ba long ban iaidkjat bad pynheh iaki lynti iaid kjat bad ban pyniasoh kawei sha kawei pat ban pynshlur ïa ka jingīaid kjat ki nongshong shnong, la ong u Myntri Rangbah.

U la kdew ruh katto katne ki sienjam pyntreikam jong ka sorkar kiba la dep sdang ba kynthup ka jingpynïaid ki wire cables shapoh ka khyndew, ka jingai rong iaki jingtei, ban shna iakin lynti iaid kjat bad pynitynnad ïa ka nongbah. 

Ha kane ka sngi Myntri Rangbah u aiti iaka song pisa KickStart cheque sha ki nongialam shnong bad pyllait ruh ïa ka kot lyngkdop Reimagining Streets.

Ha kane ka sngi la iadonlang ki samla pule college, ki dkhot NCC, ki dkhot dorbar shnong bapher bapher bad ki dkhot ki Self Help Group.