Sdang jingialang ka kylla kaba ar ka Regional Committee pynbeit pud hapdeng ka West Karbi Anglong bad West Jaintia Hills

Syllad | The Rising MeghalayaApril 25, 2023

Ka Regional Committee jong ka West Jaintia Hills District kala sdang ban shong iaka jingialang jong ka kylla kaba ar (phase 2) ban pynbeit ia u pud u sam hadpeng ka Assam bad Meghalaya.

Kane ka Regional Committee kaba la thaw dangshen ka dei na bynta hynriew tylli kiwei pat ki jaka ba iaknieh kiba dang sah ban pynbeit kiba kynthup Langpih ha West Khasi Hills District; Borduar, Nongwah-Mawtamur, Deshdoomreah, Block-ll ha Ri Bhoi District; Block-l, Psiar-Khanduli ha West Jaintia Hills District.

Haka jingialang kaba long haka sngi ba ar ha DC Conference Room na ka bynta ka West Jaintia Hills; la khlieh da u symbud Myntri Rangbah ka jylla u Sniawbhalang Dhar kum u Chairman, u Comingone Ymbon kum Vice Chairman Comingone Ymbon, haka jingdonlang u Chief Executive Member ka JHADC u Thombor Shiwat, u MDC u Aiborlang Shadap bad ki bor pynïaid District kiba kynthup u Deputy Commissioner u BS Sohliya bad u ADC u MA Challam.

Kane ka jingialang jong ka kylla kaba ar jong ka Regional Committee kadei ka sien shong kaba nyngkong na ka bynta ban pynbeit bad bishar bin bin ia ki jaka ba iakajia kiba hap hapoh ka West Jaintia Hills District, Meghalaya kaba iasam pud bad ka West Karbi Anglong, Assam.

U Chairman ka Committee u Sniawbhalang Dhar haba kren sha ki lad pathai khubor hadien ka jingshong jingïalang ula ong, ba kane ka dei ka jingialang kaba nyngkong eh katkum ka jingpynbna thymmai jong ka sorkar Jylla.

Kum ka jingsdang, ula ong ba na ka liang ka Committee kala shim jingtip shwa ia baroh ki jaka kiba hap haka jingiakhajia shuwa ban ai sha ka sorkar Jylla.

Ula ong ba ka Committee kala bthah ruh ïaka bor District ba kan sdang noh ban leh ïa kaei kaba kidei ban leh na bynta kano kano ka jingdonkam jong ka sorkar.

Ha kane ka kylla jong ka jingia pynbeit pud, ka Karbi Anglong Autonomous Council (KAAC) ka don ka bynta kaba khraw bha na bynta ka Block-I & II bad Khanduli-Psiar.