Sdang ka 36th State Badminton Championship ha Jowai

Syllad | The Rising MeghalayaAugust 28, 2019

JOWAI: Ka lympung ïalehkai Badminton- Ka 36th State Badminton Championship 2019 kaba long ha indoor hall jong ka Dorbar Shnong Khimusniang kala sdang haka sngi Balang. Kane ka lympung kan neh saw sngi lynter ha kaba kan kut haka sngi Saitjaiñ.

Ïa kane ka lympung la plie pyrda da u Deputy Commissioner, West Jaiñtia Hills District u Garod LSN Dykes IAS kum u kongsan haka jingadonlang ki nongïalam ka West Jaiñtia District Badminton Association (WJDSA) ka nongpdiang ïa kane ka lympung ha ryngkat ka jingkyrshan jong ka Meghalaya State Badminton Association (MSBA).

U DC haba kren ula ïaroh ïaka WJDBA kaba pdiang ïa kane ka lympung wat hadpeng ki jingduna bad ki jingeh kiba bun kala ban pyniaid beit iaid ryntih ban pynlong ïa kane ka lympung ïalehkai Badminton.

U DC ula pdiang sngewbha baroh ki 160 tam ki rang bad ki thei ialehkai kiba wan na kylleng ki District jong ka Jylla bad kitbok kitrwianga ïa baroh ki nong ïalehkai ba kin don ka mynsiem ïalehkai ban jop haka jingim.

“Phi ïohi ba ngim don ki jaka ïalehkai kiba paka ban pynsuk ïaki nongialehkai bad ki nongpeitkai bad nga kyrpad ia phi ban iaishah bad ngi,” ong u DC ban wer ïa baroh ban long ki nongrah khubor ban pynneh ïaka khuid ka suba ki jaka ialehkai bad ka shnong ki thaw.

Haka sngi sdang haduh 95 tylli ki jingiakhun la buh ban pyndep naduh ka kyrdan Under-13, Under-15, Under-17 bad Under-19 ba kynthup iaka Single & Double, Mixed Double, Senior Men & Women.

Na ki 11 tylli ki district la wan iashimbynta da ki 160 ngut ki nongialehkai, ka East Khasi Hills bad ka West Jaiñtia Hill ki dei kiba bun eh ki nongialehkai. Ka East Khasi Hills District ki don haduh 49 ngut ki nongialehkai, West Jaiñtia Hills 40 ngut, West Khasi Hills 6 ngut, East Jaiñtia Hills 6 ngut, South West Khasi Hills 9 ngut, West Garo Hills 21 ngut, East Garo Hills 5 ngut North Garo Hills 5 ngut, naka Young Talent Badminton Club (Mawlai) 17 ngut bad na Ri-Bhoi don tang uwei.