Sdang ka 3rd Sniawbhalang Dhar Football Tournament ha Wahiajer

Syllad | The Rising MeghalayaNovember 14, 2023

U symbud Myntri rangbah ka Jylla u Ma Sniawbhalang Dhar uba dei ruh u MLA ka Nartiang ula plie ia jingialehkai football ‘3rd Sniawbhalang Dhar Football Tournament 2023’ kaba la pynlong ha madan Mini Stadium Wahiajer haka sngi Nyngkong.

Ha kane ka tournament ki don 61 tylli ki kynhun na ki 72 tylli ki Shnong kiba don hapoh ka Nartiang Constituency. Baroh ki player ki don haduh 1830 ngut

U Ma Sniawbhalang Dhar haka jingkren ula ong, ia kane ka lympung ialehkai la pynlong shisien haka 4 snem bad tang ki rangialehkai kiba napoh ka Nartiang Constituency hi kiba lah ban iashim bynta ha kane ka lympung.

Ula iathuh ruh ba ka jingthmu ba kongsan ban pynlong ia kane ka tournament ka long ban kyntiew iaka kam ialehkai phutbol hapoh ka Constituency bad ruh ban lait ki samla ban ngop ha kino kino ki kam bymman ki bym iadei dur bad ka imlang sahlang.

Haba phai sha kam ialehkai phutbol, ula ong baroh shikatta la tip iaka phutbol kum kata ka jingialehkai ban kilan met khnang ban ioh iaka jingkoit jingkhiah hynrei kumba ka long mynta ka phutbol bad kiwei ki jingialehkai sports kidei ki karkhana ne ki lad ioh kam ioh jam ban im ja na ka bynta ki samla don sap.

Haba phai sha dewbah Europe, ula ong ba ki briew ki burom bha iaki nongialehkai. Ula iathuh ruh iaka jingwan jong u sha Barcelona, Spain bad France ha kine ki ar lai sngi ba la dep ula leitkai khnang sha iing jong u Kyllian Mbappe bad Lionel Messi, hynrei ha kane ka jingleit ym ioh wat tang ban jan namar 200 Metre la don ki nongap.

U khmih lynti ba ha kawei ka sngi yn don ki rangialehkai na kane ka thain ki ban mihkhmat iaka District sha ka state bad sha ka ri ban rah iaka nam burom ka ri bad kyntu iaki rangialehkai ban long ki nongialeh bad kim dei ban duh jingkyrmen.

U Ma Sniawbhalang ula pynbna paidbah ba iaka Final jong kane ka lympung ka ban long ha u bnai Nohprah 2023 yn pynlong ha madan Wahiajer Sports Complex kaba don hajan kane ka madan Mini Stadium, Wahiajer ka ban plie paidbah iaka da u Myntri Rangbah ka Jylla u Conrad K. Sangma.

Ha kane ka sngi la iadonlang u Chief Executive Member ka JHADC u Ma Thombor Shiwat, u Chairman ka JHADC u Dr. Sankey Shangpung, ki MDC ka JHADC, ki dkhot ki nongkitkam ka West Jaintia District Sports Association (WJDSA), ki waheh shnong, ki nongialam ka NPP napoh ka District bad kiwei kiwei.

Ha kane ka sngi sdang ka jingiakhun kala long hapdeng ka Larnai pyrshah iaka Mynsngat ha kaba ka jingiakhun ka la kut khlem don mano mano ba ioh pynkhih iaka jar.