Sdang ka AMKA ïa ka iakob ïalehkai Karate ki skul bad kolej

Syllad | The Rising MeghalayaAugust 11, 2022

Ka All Meghalaya Karate Do Association (AMKA), haka sngi Palei, ka la lah ha kaban plie ia ka pyrda ka iakob ialehkai Karate ki skul bad kolej ba la tip ia ka kum ka  28th Inter School bad 10th Inter College Karate Tournament 2022, ba la long ha Laban Sports Club Indoor Sports Hall.

Kane ka lympung ialehkai la lah ha kaban pynlong biang pat ia ka, hadien ar snem ka jingbym shym pynlong namar ka jingwan ban saphriang ka jingpang iabit Covid 19.

Ha kane ka kynti kaba mynta ki skul baroh kiba la poi ban aireng sha kane ka jingiakob ki long 52 tylli skul bad 6 tylli ki kolej bad haba khein kyllum ki khynnah ba la poi ban iashim bynta ki long haduh 327 ngut.

U kongsan ba la wan ban plie ia ka pyrda kane ka lympung ialehkai kaba lai sngi dei u President ka Mawkhar Sports Club bah Ransom Sutnga bad u symbud kongsan dei u bah Finely L Pariat General secretary Meghalaya State Olympic Association (MSOA).

Kum ka synjuk ialehkai Karate ha kane ka jylla, lada phai kyrtiang dien sha ka AMKA, dei shisha tang maka, kaba lehse kaba la ithuh bad tip bha  shaphang ki nongseng bad kumjuh ia ki nongkitkam kiba mynta, ha kaba naka shlem ka jong ka, la mih shisha ki rang ne ki thei ialehkai ba kynsai kiba ka nam ka kyrteng ka jong ki ka iai suhsien sah haduh kine ki sngi ki por kiba mynta, kampher wat la sdang ban don ruh ki riew shim kabu ba thmu ban pynpait ne pynthame da kumwei pat shaphang ka kam ialehkai ia ka Karate ha kane ka jylla, hynrei hap ban tip ba ha Meghalaya dei tang ka AMKA, kaba ki bor sorkar ne ki synjuk ba khmih ia ka kam ialehkai ki pdiang bad ithuh pura ia ka.

Haba kren kum u kongsan, u bah Ransom Sutnga u la ong ba ka jingwan iashikm bynta da palat lai spah tam ki khynnah ka pyni lypa ia ka nongmuna ba da kumno kane ka iakob ialehkai ka la long lypa kaba jop, nalor katta u la ioh jingtip ruh ba haduh katno ki nongpyniaid ki la mad bad shem jingeh ha kaban pyntyllun shakhmat ia kane ka jait jingialehkai ha kane ka jylla khamtam lei lei haba ym lah ban ioh ia kilad jingiarap ne kyrshan naka sorkar.

Kumta u bah Ransom u la ong ba u khmih lynti ba kan sa poi ka por ba shi sien ka sngi na ka liang ka jong u shimet un lah ban iarap bad ban kyrshan pura ia ka Karate bad kumjuh ia ka AMKA, kaba ia mynta u la tyrwa d ala ka mon sngewbha ba ha kano kano ka por kaba donkam, ki dkhot ka synjuk ki lah ban leit ban ia shem ia kynduh bad na ka liang ka jong u ruh un pyrshang ban iarap katba lah ei.

Kum ka dak jong ka jingiarap u bah Ransom u la noh synniang ruh sha ka AMKA ia kaba u la aiti ha u working president ka synjuuk u bah Brian Wahlang.

Katba na ka liang u bah Finely LPariat, General Secretary ka MSOA, ha kaba  nyngkong eh u pynpaw ba kum ka synjuk ka AMKA ka dei katta ka active association ba la paw bha hakhmat ka MSOA kaba ia kane ka matti treikam kadei kaba la seng nongrim ia ka naduh kaba sdang da uwei na ki riew len lade bad ba la aiti shisha met bad mynsiem ia ka Karate ha kane ka jylla u Sensei Stephan Leong (bam kwai ha dwar U Blei).

Haka juh ka por u la ban jur ruh ia ki khynnah ialehkai ba barabor kidei ban kynmaw ban nang ban burom ia ki nongpyniaid ne ki nongkitkam, namar dei kine kiba trei shisha naduh ka mynsiem khlem da ap khmih lynti ia kano kano ka jingioh nong.

Hadien ka jingialang plie, la pynbud pat da ka jingsdang jong ki jingiakob bapher bapher.