Sdang ka Behdeiñkhlam Jowai, shongshit ka shnong ka thaw

Syllad | The Rising MeghalayaJuly 12, 2019

JOWAI: Ka Behdeiñkhlam ka shad niam kaba pynlong manla u snem da ka Seinraij Jowai kala sdang haka sngi Palei da ka jingwan shaw ïa ka Symbood Khnong na Riatturiem bad la buh ha Tre Loomsooiung.

Shuwa ba ka khonraij-Chilliangraij kin mih kynhun ban leit shaw ia ka Symbood Khnong na Riatturiem bad pynpoi ha jaka niam ha u Tre-Lum Sooiung ha kaba yn buh shimiet la don ka jinglehniam Siang ka Pha, ha la ki ïing blei (Iung-blai) jong ki rympei ïing bapher bapher kiba dang bat ïaka Niam tynrai. La ngeit ba u nongbuh nongthaw ula wan sah ha ryngkat ki riewngeit kiba dang bat iaka Niam Tynrai.

Ka Lehniam Behdieñkhlam kan bteng lashai ka sngi ha kaba ki kmai raij (dong bapher bapher) kin wanrah ïaki diengkhlam bad ka Khnong Blai ban yn pynpoi ïa ki ha Iawmusiang da ki Khonraij.

U Dolloi ka Elaka Jowai uba dei u khlieh ka niam, u Puramon Kynjing ula ong ba ka jingpynkhreh bad ka jingpyndep ïaka niam Behdeiñkhlam ka long kaba iaid beit iaid ryntih. U kyrmen ba da jingïada ki blei ki syiem ka jinglehniam Behdeiñkhlam kan kut da kaba phuh ba phieng ha ryngkat ki jingkyrkhu na u nongbuh nongthaw ha kaba baroh ki nongshong shnong hapoh ka raij ka elaka kin ïoh ka jingkyrkhu ba kyrhai ban lait na ka shitom ka saja, ban biang ka kamai ka kajih bad ban roi kyrhai.