Sdang ka Behdieñkhlam ka Raij Jowai

Syllad | The Rising MeghalayaJuly 11, 2022

Mynta ka sngi ka dei ka sngi ba nyngkong jong ki “Soo sngi Le ïaw” ha kaba ki Khon Raij kiba na ka dong Chilliangraij kila wanrah ïaka Symbud Khnong na Riatturiem ban pynpoi ha Tre Loomsooïung, Newhill Jowai bah buh shimiet.

Ka lehniam Behdeinkhlam ka long ka lehniam kaba la leh man la u snem ban beh ïaka khlam ka ngoh haka imlang sahlang kiba lah ban wan haka dur ki jingpang, jingshitom, ki jingpynjot ka bor mariang bad kino kino ki jingsniew ha ka imlang ka sahlang.

Shwa ba ki Khonraij na ka dong Chilliangraij kin ïamih paidbah ha ryngkat ka bom ka ksing bad ka tangmuri ban leit shaw ïaka Symbud Khnong, ka la don ka jinglehniam bapher bapher kaba la sdang naduh ka por 5 baje mynstep da kaba u Chutia ula leit shim ïa u ‘Khoo Pyrnah’ na ïing ka Wet (Paswet, Wah Synji), ka jinglehniam kaba ki khot ka ‘Siang ka Pha’ kaba mut ba ki aibam ai dih ïa kito kiba ha ïing ha sem kiba la khlad na kane ka pyrthei, ïa kane la leh ha man ki ïing kiba dang bat ïaka Niam tynrai.

U Dolloi ka Elaka Jowai uba dei u khlieh ka niam u Ma Puramon Kynjing ula ong ba ka jingpynkhreh ïaka taïew Behdieñkhlam ha une u snem ka long ka jingpynkhreh kaba ïaid ryngkat bad ka jingbishar jong ki blei ki syiem. Hadien ka jingduh bad jingbym ïoh lad ban pyndep ïaka Behdeiñkhlam haki ar snem kiba la dep hynrei ha une u snem da ka jingisynei bad jingïeid jong ki blei ngi la ïoh ban lehkmen ïaka Behdeiñkhlam.

U kyrmen ba da jingïada ki blei ki syiem ka jinglehniam Behdieñkhlam kan kut da kaba phuh ba phieng ha ryngkat ki jingkyrkhu na u nongbuh nongthaw ha kaba baroh ki nongshong shnong hapoh ka raij ka Elaka kin ïoh ka jingkyrkhu ba kyrhai ban lait na ka shitom ka saja, ban biang ka kamai ka kajih bad ban roi kyrhai.

Lashai ka sngi 12 tarik ka jinglehniam kan sdang naduh ka por 5 baje mynstep da kaba leit kñia Aitnar katba haka por mynsngi pat ki khun ka Seijraiñ kin leit shaw ïaki Deiñkhlam na khlaw bad ban wanrah ïaki sha Ïawmusiang.