Sdang ka Behdieñkhlam, wanpoi ka symbood khnong ha Loom Soo Ïung

Syllad | The Rising MeghalayaJuly 6, 2023

Ka lehniam Behdieñkhlam ba saw sngi lai ïa jong ka Seinraij Jowai kala sdang haka sngi Palei ha kaba ki Khon Raij kiba na ka dong Chilliangraij kila wanrah ïaka Symbud Khnong na Khloo Langdoh bad pynpoi ha Tre Loom Soo Ïung, Newhill Jowai bah buh shimiet.

Ka Behdieñkhlam kalong ka jinglehniam kaba ju leh man la u snem bad la ngeit ban beh ïaka khlam ka ngoh haka imlang sahlang kiba lah ban wan haka dur ki jingpang, jingshitom, ki jingpynjot ka bor mariang bad kino kino ki jingsniew ha ka imlang ka sahlang bad ban kyrpad kyrpon iaki blei ki syiem ban bha u khaw u kba, bad ban roi par kyrhai.

Ka Behdienkhlam ka raij Jowai mynta ka kynti kan kut haka 9 tarik une u bnai bad ki mat pdeng ha une u snem nalor ki jingeh imlang sahlang, politik, ka mariang bad ka kynthup lang ruh iaki agenda ka G20.

Shwa ba ki Khonraij na ka dong Chilliangraij kin ïamih paidbah ha ryngkat ka bom ka ksing bad ka tangmuri ban leit shaw ïaka Symbud Khnong, ka la don ka jinglehniam bapher bapher kaba la sdang naduh ka por 5 baje mynstep da kaba u Chutia ula leit shim ïa u ‘Khoo Pyrnah’ na ïing ka Wet (Paswet, Wah Synji), ka jinglehniam kaba ki khot ka ‘Siang ka Pha’ kaba mut ba ki aibam ai dih ïa kito kiba ha ïing ha sem kiba la khlad na kane ka pyrthei, ïa kane la leh ha man ki ïing kiba dang bat ïaka Niam tynrai.

U Dolloi ka Elaka Jowai, u Ma Puramon Kynjing ula ong ba mynta ka sngi kaba dei ka sngi sdang la pyndep iaka jingaibam aidih iaki Sangia saret ne kiba haiing ne ki mynsiem jong kiba barim ba jah bad ka jingwan pynpoi iaka symbood khnong ha Tre Loom Soo Ïung

U kyrmen ba da jingïada ki blei ki syiem ka jinglehniam Behdieñkhlam kan kut da kaba phuh ba phieng ha ryngkat ki jingkyrkhu na u nongbuh nongthaw ha kaba baroh ki nongshong shnong hapoh ka raij ka Elaka kin ïoh ka jingkyrkhu ba kyrhai ban lait na ka shitom ka saja, ban biang ka kamai ka kajih bad ban roi kyrhai.

Lashai ka sngi ka sngi ba ar jong ka jinglehniam kan sdang naduh ka por 5 baje mynstep da kaba leit kñia Aitnar katba haka por mynsngi pat ki khun ka Seinraij kin leit shaw ïaki Deiñkhlam kynthup iaka Khnong Blai na khlaw bad ban wanrah ïaki ha Ïawmusiang.