Sdang ka CSC iaka “Bal Vidyalaya” skul ban iarap iaka lad jingtip & technology ki khynnah nongkyndong ha West Jaintia Hills

Syllad | The Rising MeghalayaMay 12, 2022

Ka Common Service Centre (CSC) kawei na ki shlem kaba pyntyllun iaki rukom treikam ka Ministry of Electronics bad Information haka sngi Balang kala sdang iaka skul “Bal Vidyalaya” ha kawei na ki shnong ha West Jaintia Hills District. Kane ka skul ka dei na ka bynta ki khynnah naduh 3 snem haduh 6 snem ka rta ha ki jaka nongkyndong ban iarap iaki ba kin ioh iaka jingnang jingtip ban pyndonkam iaki kor computer, tablet bad Internet ne kaba la tip kum ka Information and Communication Technology (ICT).

Kane ka skul kaba la sdang CSC kadei kaba don ha Mukhla, ka shnong kaba jngai kumba 10-12 kilometre na Jowai ka sorbah jong ka West Jaintia Hills District.

Ia kane ka skul la plie paidbah da u MLA Jowai u Ma Wailadmiki Shylla kum u kongsan bad haba kren haka jingialang plie, ula kyntu iaki kmie ki kpa ban shimkabu ban phah skul iaki khun ki kti jong ki ha kane ka skul namar ba kine ki skul kin weng iaka jingeh ki khynnah ha kaba iadei bad jingbymiohlad ban pyndonkam ki kor ki bor bad ka technology.

“Kine ki skul la thaw kyrpang da ka sorkar pdeng na ka bynta ban btin lynti bad plie lad iaki khynnah rit ha ki thain nongkyndong ban tip bniah iaki kor ki bor bad ka technology khnang ba kin bang bad sngewtynnad ban pyndonkam iaki bad ban lait na ka jingpep skul,” la ong u ma Wailadmiki.

Iaka jingialang plie ia kane ka skul la pyniaid da u Ryngkat Sari, la ioh ki jingkren lamkhmat na ka trai jong kane ka skul ka kong Rosemi Sari bad u Marda Oo Myrchiang, District Manager CSC e Governance-SPV, West Jaintia Hills District.

Kiwei kiwei kiba iadonlang ki kynthup iaka kong Ameecia Pariat DM CSC-SPV, West Jaintia Hills District, Comfort Rympei Assistant Manager CSC-SPV, Meghalaya, ma Buhlut Suna, Waheh Shnong Mukhla Nongrim bad u Nang Oo Chwa Sari.