Sdang ka eksam SSLC, palat 64 hajar ngut ki khynnah kiba iakhun ha ki 164 ki centre

Syllad | The Rising MeghalayaFebruary 11, 2025

Ka Exam Secondary School Leaving Certificate (SSLC) ne Matrik ba la pyniaid da ka Meghalaya Board of School Education (MBOSE) ka la sdang haka 10 tarik Rymphang bad kan kut ha ka 25 tarik Rymphang 2025.

Ki la don baroh haduh palat 64,387 ngut ki khynnah kiba iakhun ia kane ka eksam SSLC ha ka Jylla Meghalaya kiba la sdang ban thoh ia ki eksam jong ki ha ki 164 tylli ki centre, ha kaba 93 tylli ki dei kiba don ha ka Shillong Region, kata kaba kynthup ha Rilum Khasi bad Jaintia bad 71 tylli ha Tura Region ki ba dei sha Rilum Garo.

Ki khynnah shynrang kiba iakhun ia kane ka eksam SSLC ki don baroh 26,517 ngut bad ki khynnah kynthei ki don haduh 37,852, kaba kynthup ia ki kyrdan bapher bapher kata Regular – I: 29973, Regular – II: 16028, Private: 1455, Non Regular: 1884 , Improvement: 21 bad Compartmental: 15026.

Baroh ki khynnah kiba iakhun ia kane ka ekam SSLC jong u snem ba mynta kin ioh ban thoh biang sa shisien ia kane ka exam lada ki shah bat ne phiel kata tang ia ki subjek kiba ki shah bat.

Katba ki khynnah kiba iakhun ia ka eksam Higher Secondary School Leaving Certificate (HSSLC) ka ban sa sdang naduh ka 18 tarik Rymphang 2025 ki don baroh haduh 29,773 ngut.

Ha kaba iadei pat bad ka jingthmu ban pynduh noh ia ka eksam SSLC, haduh mynta ym pat don jingtip la ka sorkar kan pynduh noh ne em, hynrei lyngba ka kynhun Myntri ka sorkar jylla ka la pynkylla ha kaba iadei bad ka jingpynlong ia ka eksam SSLC na ka bynta u snem ban wan, kata yn pynlong noh ha u bnai Nohprah.

U Myntri ka tnad Pule Puthi, Rakkam A Sangma ula ai ka jingkitbok kitrwiang ia baroh ki iakhun iaka eksamin SSLC bad HSSLC ba kin leh bha bad pass bha ha kane k a eksam.