Sdang ka football rakhe jubili rupa ka Tuber Kmaishnong SCSC

Syllad | The Rising MeghalayaSeptember 12, 2022

Ka Tuber Kmaishnong Social Cultural & Sport Club kala sdang jingialehkai football kum shibynta ban rakhe iaka jubili rupa kaba la tip kum ka 25th Interdong Football Tournament haka sngi Nyngkong.

Kane ka jingialehkai kaba la sdang mynta ka sngi kan kut ha u bnai Risaw (October) jong une u snem.

Shuwa ban sdang kane ka football la don ka jingialang kaba lyngkot kaba la pyniaid da u u ma MK Ryngkhlem. La ioh ia ka jingkren kyntu kynpham na ki riew rangbah jong ka shnong kiba kynthup ia u Tellme True Phawa, general secretary Tuber Kmaishnong, u ma J Phawa, Chairman Tuber Kmaishnong SCSC bad na u Heibormi Shylla general secretary ka klob Tuber  Kordeiñlin.

Ka jingiakhun ba plie pyrda ka long hadpdeng ka Tuber Wahshnong Sport Club pyrshah ia ka Pyrdi Shnong Sport Club. Ha kane ka jingiakhun ka Tuber Wahshnong Sport Club kala jop da 5-0. U Pynainme Phawa  ula thep 2 kol bad mar shikol da u Shantre Phawa, u Babun Phawa  bad Denis Lyngdoh. La sam ruh iaka khusnam Man of the match sha u Pynainme Phawa.

Ka Tuber Kmaishnong Social Cultural & Sport Club ka ai khublei  ia u waheh shnong barim u Graham Lyngdoh uba la ai sngewbha da ki boot sha baroh ki players kiba ia shim bynta ha kane ka Tournament.

 Ia ka Tournament la phiah ha ki lai bynta, katta ka Under -14 boys, jingialehkai ki kynthei bad bad ka open to all. Ki don haduh 31 kynhun kiba iashimbynta.