Sdang ka Inter-Frontier Judo Cluster Competition 2023 ka BSF ha NEHU Shillong

Syllad | The Rising MeghalayaAugust 21, 2023

Ka tnat shipai Border Security Force (BSF), Meghalaya Frontier ka la lah ban pynlong ia ka “Inter-Frontier Judo Cluster Competition 2023,” ka ban long san sngi kynthih naduh mynta ka sngi 21 haduh ka 25 tarik mynta u bnai hapoh NEHU, Shillong.

Ha kane ka jingiakop ki la don khatwei tylli ki team na ka bynta shipai BSF Frontier kiba la wan ban iashim bynta ha kane ka tournament.

Ia ka jingialang plie ia kane ka lympung ialehkai Judo la pynlong mynta ka sngi ha NEHU Shillong ha ka jingiadon lang u Dr. Lajja Ram Bishnoi, IPS, Director General of Police, Meghalaya kum u kongsan nalor ka jingsynran lang da u Pradip Kumar IPS, Inspector General of BSF Meghalaya Frontier nalor ki heh shipai na kine ki tnat jong ka thain.

Ha kane ka jingialang la sakhi ruh ia ka jingpyntian smai bad bud da ka jingiaid march past da ki team kiba iashim bynta nalor ki jingtem jingput na ki shipai BSF, kumjuh ka jingiashim bynta da ki dkhot ka tnat shipai kumjuh da ki khynnah skul BSF ha ki prokram kiba iadei bad ka kolshor.

U Kongsan ha ka jingkren u la ai ka jingiaroh ia ki team kiba la wan ban iashim bynta bad pynshlur ruh ia ki ba kin pynpaw iala ki jong ki sap ki phong kum ki nongialehkai. Nalor kata u la pynpaw ruh halor ka jingdonkam ia ki jingialehkai sport hapdeng jong kane ka tnat shipai ka ban kyntiew ia ka koit ka khiah, ka rukom im bad ban pynioh ruh ia ka mynsiem jong ka jingiatylli.

Ha kajuh ka por u la pyrto ruh ia ki sienjam ba la shim da kane ka tnat shipai BSF ban kyntiew ia ki kam ialehkai sports bapher bapher.