Sdang ka JHDS ïaka Free Tuition Class na ka bynta ki khynnah kiba wan na ki longïing ba duk ha Mihmyntdu

Syllad | The Rising MeghalayaSeptember 30, 2021

Ka Jaintia Hills Development Society (JHDS) kawei na ki kynhun niam jong ka Balang Katholik Jowai Diocese lyngba ka jingkyrshan ka kynhun Khublei kaba na ri Germany haka kala plie ïaka jingai jinghikai ei ne Free Tuition Class kyrpang na ka bynta ki khynnah kiba wan na ki longïing ba duk (Underprivileged Student) haka sngi Palei.

Ka jinghikai kan long kyrpang tang na bynta ki khynnah Class IX bad khynnah Class X jong ki artylli ki skul, ka RC EVE Secondary School, Mihmyntdu bad ka Don Bosco Secondary School, Mihmyntdu kiba don 57 ngut.

Ïa u maw nongrim jong kane ka jingai jinghikai la plie da u Fr. Manbha Pakem uba long u Director jong ka Jaintia Hills Development Society (JHDS) haka jingïalang kaba la pynïaid da u Coordinator JHDS u Bah Denis Kurkalang haka jingïadonlang ki khynnah skul bad nonghikai ha Hall RC EVE Secondary School, Mihmyntdu.

U Fr. Manbha Pakem ula pyntip ba ka jinghikai kan long ïa baroh ki subject khamtam ka Mathematics bad Science naduh sngi Nyngkong haduh sngi Thohdieng bad ka jinghikai kan sdang naduh ka 4 tarik bnai Risaw naduh ka por 4.00 baje janmiet haduh 5.30 baje janmiet.

Ïaka Free Tuition Class ngi la jied ban buh hangne namar ngi shem ba ki bun ki khynnah na Mihmyntdu kidei kiba wan na ka longïing baduk ba duna ka jingïoh jingkot bad kiba shong sah trei ha ïing ki briew, ong u Fr. Manbha Pakem.

Kiwei de kiba la jingkren ki long ka Sister Maria Joseph Headmistress Don Bosco Secondary School, ka Kong Tina Lakiang Secretary RC EVE Secondary School, u Bah Federick Sunnah Chairman Committee Balang Mihmyntdu.

Boroh ki nongkren ki la kyntu ïaki khynnah ban shim kabu ïaka jingai jinghikai khlem da pynleh nohei namar ba la mang kyrpang na bynta jong ki.

“Ban ïoh jingjop kum u/ka khynnah skul ka nuksa kaba donkam eh ka long ka jingminot bad jingtrei shitom ban pule, ka jinglong khuid, ka jinglong shisur, ban long kiba shida bad ba shisha. Lada phi lah ban bud ryntih ïa kine ki kyndon khlem pep phin long u/kaba kmen tam bad jop haka jingim”, ong kitei ki nongkren.

Ki la ai jingïaroh ïaka jingstad jingshem phang jong ki dkhot ka JHDS ban sdang da kane ka kam kaba bha bad ka ban ai jingmyntoi ïaki khynnah ba wan na ki longïing baduk.