Sdang ka jingai jinghikai shna jingbam bad sengkam haka shnong Darrang

Syllad | The Rising MeghalayaJuly 30, 2022

Ka jingai jinghikai shna jingbam ne food processing bad ka jingdie bam ha ki jaka paidbah kala sdang haka sngi Thohdieng haka shnong Darrang, ka shnong kaba don ha khappud India Bangladesh ha Amlarem Sub Division.

Ka Darrang kadei ka shnong kaba paw haka kam jngohkai pyrthei kaba don marjan bad ka shnong Shnongpdeng bad baroh ar tylli kine ki shnong ki don harud ka wah Umngot kila khring bha ia kiba bun namar ka jingkhuid bad jingshngiam ka wah.

Kane ka jingai jinghikai ka dei kaba pyniaid da Society for Urban and Rural Empowerment (SURE) da ka jingiatreilang bad ka ophis jong u Deputy Commissioner, Jowai. La kyrshan da ka Border Area Development Program (BADP) West Jaintia Hills bad ka Meghalaya State Skills Development Society (MSSDS) West Jaintia Hills District.

Kane ka jingai jinghikai ka dei ka wat kaba lai lane 3rd Batch Skill Training.

U Secretary ka SURE Dr. H. H Mohrmen ula ong ba yn ai jinghikai ha ki ar bynta katta, ka Food Processing bad kawei pat ka Street food. Ula ong ba ha juh ka por yn hikai ban seng kam seng jam (Entrepreneurship), kumno ban ioh ram na ki bank bad ruh kumno ban kin ioh iaka  FSSAI Certificate.

Ka jingthmu ka jinghikai ka long kumno ban iarap iaki samla ban ieng hala ki jong ki kjat.

Ha kane ka jingkhyllie ia kane ka jinghikai la iadonlang u Dolloi, Elaka Darrang u Pyrwa Lymba uba long kum u kongsan, waheh shnong ka Shnong Darrang u Ma N Ryngksai.

Kiwei kiba iadonlang ki kynthup ia u Skill Development Officer (SDO) MSSDS, Lambor Suchen, general secretary JSU  Treiborlang Suchen.