Sdang ka jingai tika ia ki khunlung bad longkmie armet ha West Jaintia Hills

Syllad | The Rising MeghalayaAugust 7, 2023

Ka Additional Deputy Commissioner, West Jaiñtia Hills District, ka kong HML Kynta mynta ka sngi ka la plie ia ka prokram ai tika injek ba la tip kum ka ‘Intensified Mission Indradhanush 5.0’ na ka bynta ki khunlung khynnah kumjuh ia ki longkmie armet.

Haba kren ha kane ka jingïalang ba la pynlong ha MCH Hospital, Panaliar, Jowai, na ka liang ka Kong Kynta kum ka Kongsan ka pynkynmaw ba ia kane ka prokram ai tika injek yn pynlong ha ki laikylla na ka bynta mar hynriew sngi ha baroh ki jaka sumar ne health centre khlem da donkam jinglut. Ka pynshlur ruh ia ki kmie ki kpa bad ia ki longkmie armet ba kin shim ia kane ka kabu bad ban pynioh ia ka jingai tika ha ki jaka aijingsumar kiba jan tam.

Nalor kata ha kane ka prokram la ioh ruh ka jingpynshai halor ki jait tika injek na ka bynta ki khunlung khynnah ki ban iada na ki jingpang bapher bapher lyngba u Dr. E. Suchiang, Pediatrician, Jowai, uba la pynpaw ruh ba kim dei satia ban iaid lait ia ki dawai ai injek kiba dei ban ioh naduh ka por ba pun ia i khunlung hapoh kpoh  haduh ba la kha ha kaba ki hap ban bteng ia ka jingai injek.

Kumjuh ka Dr. Helen Uriah, District MCH Officer, Jowai ka la batai bniah halor ka jingdonkam jong ka (MCP Card), ka ban iarap ia ka rukom ai injek ha ka por ba wan mih sha ki jaka sumar.

Nalor kata ka la pynshai ruh ba kane ka prokram kaba lai bynta kan sdang  naduh 7 tarik mynta u bnai haduh 12 tarik, ka kylla ba ar 11 tarik u Nailur  haduh 16 tarik u Nailur bad naduh ka  9 u October haduh 14 tarik u Risaw 2023.