Sdang ka jingdih dawai wieh ki khynnah bad samla ha West Jaintia Hills bad ka Jylla baroh kawei

Syllad | The Rising MeghalayaOctober 12, 2020

Ka ophis u District Medical & Health Officer (DM&HO), West Jaintia mynta ka sngi ka la sdang iaka “National Deworming Day” ne ka prokram pyndih dawai wieh iaki khynnah khyllung naduh 1 snem ka rta haduh ki samla 19 snem ka rta.

Kane ka prokram pyndih dawai wieh kaba la sdang mynta ka sngi Nyngkong kan kut haka 19 Risaw.

U Ma Lyngkor Kynjing, Additional Deputy Commissioner West Jaintia Hills, haba kren kum u kongsan haka prokram ialang plie, ula kyntu iaki kmie ki kpa ban ialam iaki khyllung bad ki khynnah sha ki jaka ai dawai ban ioh bynta ha kane ka National Deworming Day. Ula kyntu iaki ASHA ban leit mih ha man ki thliew iing bad ban pynsngewthuh iaki kmie ki kpa jong ki khynnah namar bun ki kime ki kpa ki dang donkam ka jingpynsngewthuh ia kane ka rukom ai dawai.

Ula ong ba ki khynnah kiba don wieh ki long jaituh, thait bad duna haka rukom bam bad tlot ka bor jabieng bad ki ioh kem ia kiwei ruh ki jingpang.

Ia kane ka prokram pyndih dawai wieh la sdang na Ladthadlaboh Urban Primary Health Centre, Jowai haka jingiadonlang ka Dr M. Syngkon kaba long ka District MCH Officer ka la pynsngew ba ka thong jong ka National Deworming Day ka long ban iarap ia baroh kito ki khynnah kiba naduh 1 snem rta haduh 19 snem rta ban lait na ka jingdon wieh. 

Ka ong ruh ba lada ki khynnah kim dih dawai wieh, ki dak ki shim kin paw kum ka jingat kpoh, pynhiar kpoh, prie, duna snam nalor kiwei ki jingshitom.

La iadonlang u Dr S. Warbah Urban Health Consultant, ki nongtrei jong ka UPHC kynthup naduh ki ASHA, ANM, ki khynnah ba wan dih dawai wieh bad kiwei kiwei haka jingialang kaba la pyniaid da ka Dr E. Challam Additional DMHO. 

Kane ka jingai dawai wieh la pynbeit ruh ban ai dawai haki Aganwadi Centre khlem da donkam ban siew eiei.

Ia kane ka prokram dih dawai wieh la pynlong la kylleng ki District jong ka Jylla bad ka ri ban iakhun ban pynduh jait iaki wieh ba don haka met ki khynnah, ki samla ban ioh iaka met kaba koit kaba khiah.