Sdang ka jinghikai ban shna jingbam bad wine ha Khliehtyrshi

Syllad | The Rising MeghalayaJune 15, 2022

Ka jingai jinghikai kaba 23 sngi lynter iaki longkmie haka shnong Khliehtyrshi ban shna iaki jingbam, ri ngap bad ban thung iaki syntiew ki skud kala sdang haka sngi ba Ar.

Ka kongsan kong Baianti Blah, BDO Thadlaskeiñ C& RD Block kala plie paidbah ia kane ka jingai jinghikai. Ka kong Blah BDO, Thadlaskeñ block haba kren kum ka kongsan kala kyntu ïa ki longkmie kiba don ha kane ka training ba kin shim khia ïa kane ka training bad leh ïa kiba bun ki kam bala hikai ïa ki khang ba kin nangkyntiew ha ka ïoh ka kot jong ki.

Kala ïathuh khana shaphang kiba bun ki nongrep hapoh ka Block kiba lyngba ka jingïarap kaba ki ïoh na ki SHG kila lah ban kyntiew ïa ka kamai kajih jong ki shimet bad ka ïng ka sem jong ki ruh.

Kane ka training ka kynthup ïa ka jingai jinghikai kum ha kam ri ngap, thung syntiew, kaba shet ingbam tynrai, shet cake, pynkylla ïa ka ñut sha ka sboh bad ka jingbam sniang, shna dawai khniang ïa ki jhur, ka kam shna umsoh, achar, wine, mitkit, ka jinghikai kumno ban seng kam lajong, ki sap nongïalam bad ka rukom kren bad ïadei paidbah.

Ia kane ka jingai jinghikai la pynlong da ka Grassroot haka jingiatreilang bad Society for Urban and Rural Empowerment (SURE) bad kyrshan pisa da ka Quest Alliance na Bangalore.

Ha kane ka jingialang plie la iadonlang ka kong Mayfereen Ryntathiang kaba long ka president jong ka seng trei mon sngewbha ka Grassroot, Dr HH Mohrmen, Secretary SURE, u ma Kitbok Rymbai Waheh Chnong Khliehtyrshi nalor kiwei kiwei.