Sdang ka jinghikai iaki khynnah skul klas 9-12 ha Rilum Jaintia

Syllad | The Rising MeghalayaSeptember 22, 2020

Kiba bun ki kmie ki kpa kim pat long satia kiba la pynkhreh ban phah ïaki khun ki kti jong ki sha skul kumjuh ki nonghikai bad ki bor pyniaid skul ruh ki dang pynkhreh ban pynbeit kumno ba kin shim klas ne ban iarap iaki khynnah ba wan sha skul.

Kumban shu pynkynmaw ka sorkar Jylla ka la pynbna ba la shah iaki khynnah skul klas 9-12 naduh ka 21 tarik ban leit shah syllok bad shah hikai ban ioh jingshai halor ki jingeh ba ki ïakynduh ha kino kino ki sobjek.

Kumta ha kaba ïadei bad kane la sakhi ba ki khynnah skul ha sor Jowai kiba leit shaki skul haka sngi Nyngkong ka long kiba dang duna bha bad bun na ki bor pynïaid skul ki pynlong shwa tang ki jingialang hapdeng ki para nonghikai ban pynbeit halor kane ka kam

Ha kaba ïadei bad ka jingwan jong ki khynnah sha skul la ioh ban iakren bad u Vice Principal jong ka KJP Synod Mihngi Higher Secondary School u Bah Wanmi Passah uba la iathuh ba haka skul jong ki, la don 20 ngut ki khynnah skul kiba la wan sha skul ban ïoh jingshai na ki nonghikai bad kine ki khynnah kidei kiba la ïoh jingbit na ki kmie ki kpa.

Ha kaba ïadei bad ka jingpynkhreh, u Bah Wanmi Passah ula ïathuh ba kum ki bor pynïaid skul ki la pynkhreh ïa kane namar ki sngewthuh ba ha nongkyndong kin ym lah satia ban shu shaniah tang ha ki online klas na kadaw ka jingbym biang ka Internet khamtam ïaki khynnah kiba sah sha ki thaiñ nongkyndong.

Ka Kong Wa-isa Sumer nonghikai jong ka Govt Girl’s Higher Secondary School ka la ong, namar ba kadei ka sngi sdang artad ki khynnah ki dang duna, ki pynlong tang ka jingïaphylliew jingmut para nonghikai na ka bynta ban bhah iaki khynnah ban wan sha skul.

“Na ka bynta kaba lashai ngi la shna shwa da ka kynja routine kaba Lai kynta shisngi kaba sdang naduh 10 baje mynstep haduh 1.00 baje nohphai sngi namar ïa mynta ngin ym lah ban bat slem ïaki khynnah”, ong ka Kong Wa-isa Sumer.

Na ka liang u Principal jong ka skul North Liberty Higher Secondary School u Bah Richard Uriah ula ïathuh ba mynta ka sngi sdang la don tang uwei bad arngut ki khynnah ba wan sha skul bad nangne shakhmat lada ki wan ngi kloi ban iarap bad lada ki wan bun ngin hap ban peit ba kan long katkum ka kyndon ba la bthah da ka sorkar.