Sdang ka jingiakhih ka JSM, byrthen iakhih sa ki nongkhaii bad sengbhalang ba kit dewiong na Assam

Syllad | The Rising MeghalayaMay 11, 2020

Ka Jaintia Students’ Movement (JSM) hynne ka sngi Nyngkong kala shong kyllain myngngor ban pyrshah ïaka jingailad ka sorkar Jylla ban kit dewiong na Assam ban pyndap iaka jingdonkam dewiong ki kharkhana dewbilat ha East Jaintia Hills District.

U Leningstar Rymbai, president JSM ula ong ba kila thmu ban shong kyllain myngngor ha khyrdop ban rung sha East Jaintia Hills ha Tuber Shohshrieh, hynrei kila shah beh bad kila pynlong ïa kane ka jingshong kyllain myngngor ha ophis ka JSM Khliehmyntriang, East Jaintia Hills District.

Une u nongialam ula ong ka JSM kala ieng haka nongrim ban pyrshah beit ia kane ka jingailad ka sorkar ban kit dewiong na Assam namar ba kane ka Jylla la kiew ka jingiabit ne pur ka khlam COVID-19 bad kim kwah ban lyngba ki nongniah trok ne ki nongbud trok kin wanrah ia ka khlam sha kane ka district.

Ka JSM kala dawa naka sorkar Meghalaya Democratic Alliance (MDA) ban pyllait noh u dewiong uba la mynjur ka NGT (National Green Tribunal) ban lilam. Ula ong ba ka NGT naduh u bnai Lber 2020 kala rai ban pyllait 2 lak Metric Tonnes naka 32 lak Metric Tonnes u dewiong ba la dep tih ban lilam hapoh ka jingpeit ka CIL.

Also Read | Wat khot sngewbha iaka khlam COVID-19, pyllait ia u dewiong 2 lak ton

Ula ong ruh ba lada ka sorkar kan pyllait ia une u dewiong, kine ki kharkhana ruh kim donkam ban kit dewiong na bar Jylla bad ka East Jaintia kaba don haduh 75 hajar metric ton u dewiong bala dep tih bad ka lah ban pyndap dewiong ïa kine ki kharkhana.

“Ka sorkar jylla kadei ban pyllait ia une u dewiong 2 lak metric ton khnang ba ki briew kiba im jakpoh naka khaii dewiong kin ioh ka lad ban kamai kajih ha kum kane ka por ba khang khyrdep,” la ong u Leningstar Rymbai.

Shuh shuh ha ka juh ka por ka synjuk jong ki nongkhaii dewiong bad ka synjuk waheh shnong bad ki sengbhalang ba kynthup iaka Jaintla Coal Miner Dealer Association, East Jaintia Coal Supplier Association,  Jaintia Amalgamated Redressal Forum, Meghalaya People Labour Union Jaintia HIils District Committee, Jaintia Students Movement Central Body, East Jaintia National Council, Hynniewtrep National Youth Front East Jaintia Zone, Khasi Students Union East Jalntia Hills District bad ka Synjuk Waheh Shnong East Jaintia Hills District kila ai da ka dorkhat ha u Director General of Police ban pynpaw ka jingpyrshah halor kane ka jingkit dewiong na Assam bad kiwei ki jylla.

“Ngi pyrshah jur ïaka jingai jingbit ka sorkar ban kit dewiong na Assam bad kiwei ki Jylla sha ki kharkhana dewbilat ha East Jaintia HIiis District namar ba ka buh iaka jingim bad ka koit khiah ki nongshong shnong ka East Jaintia Hills District bad ka jylla baroh kawei haka jingma namar ka khlam COVID-19,” la ong ka dorkhat kaba la phah kine ki kynhun.

Ka dorkhar ka ong “Ngi ki sengbhalang ngi dawa ban pyndam mardor ia ka hukum jong ka sorkar jylla ban shah kit dewiong na Assam bad lada ym pyndam ngin mih pyrshah hadpeng ka lockdown kaba la pynjari ban ia khun iaka khlam COVID-19 da kaba ngin pynlong iaka jingialang paidbah bad ki jingiakhih kum ki strike bad kiwei kiwei.”