Sdang ka jingiakhih ka KSU ban dawa kyntiew kyrdan iaka Mawsynram C&RD block sha ka civil sub division

Syllad | The Rising MeghalayaAugust 10, 2024

Ka Khasi Students’ Union (KSU) kala pynlong iaka jingshong kyllain mungor haka 10 tarik Nailar ha iew Mawsynram ban dawa kyntiew kyrdan iaka Mawsynram C&RD block sha ka civil sub division.

Ia kane ka jingiakhih la pynlong da ka KSU South West Khasi Hills, KSU Sawsymper Circle, KSU Balat Border Area Circle bad KSU Lawbah Border Area Circle.

Ka Mawsynram CRD Block ka don ka jingheh kam duna ïa ka 5000 sqkm, ha kaba ka don palat 162 tylli ki shnong bad palat 44 hajar ngut ki nongshong shnong.

Haba kren u General Secretary of KSU South West Khasi Hills, u samla Jiedskhem Nongsiej ula ong ba kane ka jingdawa kyntiew kyrdan Civil Sub Division kam dei tang ka jingdawa jong ka KSU, hynrei kila ioh ka jingkyrshan jong kiba bun ki nongshnong shnong bad ki nongialam shnong jong ka thain Mawsynram kaba la sdang naduh u snem 2018.

Ula ong ba ka jingdawa ban kyntiew kyrdan ia ka Mawsynram CRD Block sha ka Civil Sub-division ka long kaba donkam bha namar ba ka Mawsynram ka long kaba jngai bha na ka bynta ki nongshong shnong ban leit sha Shillong bad kane ka buh jingeh iaki paidbah ban beh iaki kam kiba barit ba ria sha Shillong.

“Kumba phi tip ka Mawsynram ka jngai palat 60 km na nongbah Shillong, bad ki don ruh ki shnong ha ki thaiñ khappud kiba jngai palat 90 km bad kane ka buh jingeh ïa ki paidbah ban wan baroh shilynter sha nongbah Shillong” u la bynrap.

Une u nongialam ka KSU South West Khasi Hills u la ong ba ka seng ka la dep ban thoh sha u myntri rangbah ka jylla ban buh por ia ka jingialang, hynrei haduh kine ki sngi ka seng kam pat ioh kano kano ka jubab.

U samla Jiedskhem ula ong ka rai kaba mih na jingialang shong kyllain mungor ka KSU ka long ban bteng iaka jingiakhih da kaba pynlong pat sa iaka pakhang ophis bad hadien pat kan shim ia kiwei ki sienjam da kaba lum shuwa iaka nongialam raid bad ki nongialam shnong.