Sdang ka jingialang hapdeng heh BSF bad BGB ban iatreilang halor ki kam khappud

Syllad | The Rising MeghalayaJuly 2, 2024

Ka Co-ordination Conference ba saw sngi hapdeng ki Inspector General ka BSF bad Regional Commander ka Border Guard Bangladesh (BGB) halor ki kam khappud ka la sdang ha ka 1 tarik mynta u bnai hapoh ka campus jong ka BSF ha Umpling.

Ia kane ka jingialang la ju pynlong arsien ha ka shi snem hapdeng ki shipai khappud ka BSF bad BGB na ka bynta ban iamir jingmut lang halor kiba bun ki mat bad ban don ia ka jingiasngewthuh jingmut ban khmih halor ki kam khappud bad ban tehlakam ia ki kam pyntriem ha ki thain khappud hapdeng kine ki artylli ki ri ba marjan, kumjuh halor ki kam pynroi kiba dang sahteng ha ki thain khappud bad halor ki sienjam ban tehlakam ia ki kam rungtuh lyngba ki jaka khappud.

Ha ka 1 tarik mynta u bnai ia ka kynhun ki nongmihkhmat na ka BGB la pdiang sngewbha da ki heh shipai ka BSF ha ICP Dawki bad hadien kane ka kynhun ka la wam poi hapoh ka campud ki BSF ha Umpling, Shillong na ka bynta kane ka Conference kaba saw sngi kynthih.

Ia kane ka kynhun ki heh shipai ka BGB kaba kynthup ia ki 13 ngut ki dkhot la lamkhmat da u Md Shazedur Rahman, Additional Director General, Region Commander jong ka South East Region, Chattogram.

Katba na ka liang ka BSF na India ia ka kynhun ki 13 ngut ki dkhot la lamkhmat da u Sh. Patel Piyush Purusottam Das, IPS IG BSF Tripura Frontier ha ryngkat ka jingiadon lang ki heh ka BSF na Meghalaya, Silchar bad Tripura nalor ki heh na ka MHA, MEA bad NCB.

Kane ka jingialang kan kut ha ka 4 tarik mynta u bnai ha kaba kan don ka jingiasoi ia ka Joint Record of Discussion (JRD) da ki nongialam na baroh kine ki ar kynhun shipai.