Sdang ka jingialap elekshon u Bah Robertjune Kharjahrin

Syllad | The Rising MeghalayaJanuary 24, 2024

Ka Regional Democratic Alliance (RDA) kaba kynthup iaka UDP bad HSPDP haka 23 tarik Kyllalyngkot kala sdang iaka jingialap elekshon jong na ophis ka UDP ha Shillong.

Ha kane ka juh ka sngi la pyntithuh ruh ia u kyrtong ia monlang u bah Robertjune Kharjahrin sha ki MLA, MDC bad ki nongialam jong ki artylli ki party.

Haba kren ha kane ka jingïalang u Chairman ka RDA bad u President ka UDP u Bah Metbah Lyngdoh u la ong ba ka jingwan ïatreilang jong ki ar tylli ki party riewlum ka dei namar ki paidbah ki angnud ba kine ki ar tylli ki seng saiñ pyrthei trai ri kin don ka jingïatreilang bad u la ong ba mynta ka dei sa ka pali ki paidbah ban ai jingkyrshan pura ia u Bah Robert uba kum ka kynhun ki la i biang ban sei.

U Secretary ka RDA uba dei ruh u President ka HSPDP u Bah KP Panniang u la ong ba ka jingsei ïa u Bah Robert la la dei ka jingangnud ban rah biang ia ka burom ka jaidbynriew ha khmat ka pyrthei bad ka dei sa u paidbah ban shim khia ïa kane ka mat.

U Co chairman ka RDA bad u riew saiñ pyrthei uba la rim haka Jylla, Bah Martle Mukhim u la ong ba ka jingïaid lynti jong ki seng saiñ pyrthei trai ri ha ki snem kiba kham mynshuwa ka la dei ka sakhi ba lada ka UDP bad ka HSPDP ka ïatreilang u kyrtong ba ka sei ki ju jop beit na kata ka daw ha kane ka kynti kum ka kynhun kim don kano kano ka jingartaien ba u Bah Robert un jop ha kane ka elekshon ban wan.

U Bah Robertjune haka jingkren kaba nyngkong eh kum u politician ula kren halor ka jingdawa Inner Line Permit, ka jingpyrung iaka ktien Khasi haka eighth Schedule, ka jingshah thombor ki nongshong shnong ka Jylla ha khappud India Bangladesh bad ka jingpynbeit pud hapdeng Assam bad ka Meghalaya

Ula ong ruh ban un rah iaka ishu na ka bynta ban ioh iala ka jong ka Cadre na ka bynta ka Indian Civil Services ha Meghalaya.