Sdang ka jingialap halor ka ‘Jal Diwali’ ha ka jylla Meghalaya

Syllad | The Rising MeghalayaNovember 8, 2023

Ka Jal Diwali – “Ka jingialap ne ka Campaign na ka bynta ki longkmie ha kaba iadei bad ka um, ka um ia ki longkmie” hapoh ka Housing and Urban Affairs ka la sdang haka sngi ba Ar ha Meghalaya lyngba ka jingrakhe ha Urkhla Water Treatment Plant, Jowai.

Ka tnat Housing and Urban Affairs jong ka Sorkar India ka dang pynlong ia ka ‘Campaign na ka bynta ki longkmie ia ka um, ka um ia ki longkmie’ ban rakhe ia Jal Diwali naduh ka 7 tarik haduh ka 9 tarik u Naiwieng, 2023. La ialam ia ki dkhot jong ki SHG jong ki longkmie DAY-NULM sha ki jaka pynkhuid um ne ki Water Treatment Plant (WTP) ba kin sngewthuh ia ki rukom treikam ha ka jingpynbiang ia ka um kaba khuid bad kaba shngain sha ki longiing. Ka jingthmu jong kane ka jingleit sha kine ki jaka ka dei ban wanrah ia ka jingsngew lajong bad ka jingsngew trai ha ki longkmie ha kaba iadei bad ki jingdon jingem kiba iadei bad ka um.

Kane ka jingleit ha Jowai ka la sdang da ka jingai jingkren da ka City Coordinator, DAY-NULM, Jowai ka Kong Emica S. Rymbai kaba la pdiang burom ia ki ophisar na AMRUT, DAY-NULM, PHE bad ki SHG kiba la wan iashim bynta ha kane ka prokram.

Ha ka jingiakynduh bad ki paidbah, ki ophisar na ka AMRUT, ki nongpyniaid na ka jylla bad ka nongbah ki la batai shaphang ka thong jong kane ka campaign bad ka jingdonkam jong kane ka jingleit peit ia kine ki jaka pynkhuid um. Ki la pynshlur ia ka jingiashim bynta ha kane ka prokram khnang ban pyniar ia ka jingsngewthuh shaphang ka kam pynpoi um ha ka nongbah jong ki.

U SDO, PHE ba dei peit ia kane ka jaka pynkhuid um, u Bah Roskil Challam u la pyni ia ki ophisar bad kito kiba wan iashim bynta ia ki bynta bapher bapher jong kane ka jaka pynkhuid um bad u la ai jingbatai ruh shaphang ka kam ba trei ha kane ka jaka. Ki nongiashim bynta ki la buh shibun ki jingkylli ia ki ophisar shaphang kane ka jaka pynkhuid um. Ki la ai jingsngewnguh ruh ia ka tnat kaba la pynlong ia kane ka prokram ha ka Diwali.

Hadien ba la dep pyni ia kane ka jaka treikam, ka la don ka jingialang ban ioh ia ki jingmut jingpyrkhat jong ki nong iashim bynta. Ki ophisar ki la bataiia ki kam bapher bapher ha ka jingpynkhuid um. Ha kane ka jingiakren bad ki dkhot SHG, ki ophisar ki la ban jur halor ka jingkongsan jong ka um bad ka jingdonkam ban pynnehia ka.

Ia ka Jal Diwali yn pynlong ha 3 tylli ki ULB ha kylleng ka jylla Meghalaya ha kaba yn leit peit ia ki jaka pynkhuid um naduh ka 7 haduh 9 tarik u Naiwieng, 2023. La pynkhreh ban don kum kane ka jingleit peit ia ki jaka pynkhuid um ha ka 8 bad 9 tarik u Naiweing ha ka Mawphlang bad Nongstoin ULB.