Sdang ka jingpynkhih paidbah ban pynkylla spah iaka ñiut ha Jowai

Syllad | The Rising MeghalayaMarch 19, 2022

U khun bynriew u dei u jingthaw uba kongsan u ba pynjot pynpra iaka sawdong sawkun ka mariang.

U briew u dei uba lap nyngkong iaka ding bad hadien la wan sa ka jingstad ha u briew kaba la nang nang roi, pynban ka jingwan ka stad saian bad ka technology kala nang pyntroin pynban iaka sawdong sawkun ka mariang.

U khun bynriew ula kylla ka rukom im nadong hadong, naduh ka bam ka dih bad jingpynmih iaki ñiut ki ñier ki jakhlia jakhlait kiba har rukom kiba ktah iaka koit ka khiah ka mariang bad baroh ki lai phew jingthaw.

U Snem 2021-2022 u dei u snem jong ki ñiut iaka Jowai: Naduh u bnai Lber 2021 hadien bala pyrshah ka Khasi Students’ Union (KSU) bad ki 7 shnong kiba don marjan ka jaka bret ñiut ha Mynkjai, ka Jowai haduh mynta kam pat ioh iaka jaka theh ñiut kaba pura. Ka jingpyrshah jong ka KSU bad ki 7 Shnong ruh ka dei kaba shong nongrim namar maki ruh ki don ka hok ban ioh iaka sawdong sawkun kaba khuid namar ka jingtheh ñiut ha katei ka jaka kala long shaba palat liam kaba iaid shabar ka kyndon aiñ sorkar ban bret ñiut.

Ka Jowai ruh ka don ka hok ban ioh iaka jaka bret ñiut kaba paka. Ki ñiut kiba mih ha Jowai kim dei tang na ki nonshong shnong ka Jowai, hynrei na u khun bynriew uba wan ban kamai kajih ha kane ka sor bah jong ka West Jaintia Hills District.

Ka Jowai Municipal Board kala pyrshang ban wad iaki jaka, hynrei kane ka tnad kaba hap hapoh ka tnad pynroi sor kala phiel ban ioh iaka jaka hadien bala kynnoh ba kane ka tnad kala lyndet iaka rukom treikam bad thmu ban thied jubor iaka jaka khlem ka jingmynjur u paidbah.

U Paidbah na kylleng ki shnong kim don ka jingshaniah ia ka Jowai Municipal Board, namar ba ki tieng ba ki jaka ba pyndonkam kane ka tnad kin shu long tang kum ki jaka theh ñiut ne dumping ground.

Ka Jowai Municipal Board katkum ka jingpynbna jong kala tyrwa ban thied iaka jaka ban shna iaka jaka theh ñiut katkum Solid Waste Management Rules 2016, hynrei kaba lyngngoh pat wat u Myntri Pynroi Sor, u Sniawbhalang Dhar haka jubab jong u iaka jingkylli u MLA ka Umroi Bah George B Lyngdoh haka dorbar mang tyngka kaba dang shu dep um shym la lah satia ban ai ka jubab kaba shai kaba kumno ka jaka bret niut ka Jowai Municipal Board kan shna. Kane ka wanrah jingkylli kaba bun balang bad ki sah haka umdum.

Kane ka jingeh ïaki ñiut ki ñier kalong ym tang ha Jowai, hynrei ha sor Shillong, Tura, Ri Bhoi, pynban ka sorkar dang mynta ka sdang ban khih khohreh ban wad iaki jaka ban bret ïaki ñiut katkum ka rukom stad saian, hynrei ka plan pat imat dang sha suiñ.

Ka por kala dei eh ban pyni da ka kam ne ka khih paidbah (people movement) ban iakhun iaki jaboh plastic:

Kane ka jingbym lah ka Jowai Municipal Board ban lum iaki ñiut ha Jowai kala pynlong ia kawei ka seng kaba Khooid Ya ka Wah Myntdu (KYKWM) ban pynkhih ia u paidbah ban ialap pynsngewthuh halor kumno ban pynkylla ïaki ñiut ba pyut sha ka spah bad ka jingbam na ka bynta ki jingri jingdup.

Ia kane ka jingai jinghikai la pynlong ha ïingdorbar ka Lion Mission Compound bad la wan ban ai jinghikai da seng Society for Urban & Rural Empowerment (SURE) haka sngi Thohdieng.

U Dr Rev HH Mohrmen president Society for Urban & Rural Empowerment (SURE), Jowai ula batai halor ka waste to wealth. Ula batai kumno ban pynduna ban pyndonkam bad ban pynkylla thymmai biang ïaki mar ba pynmih khamtam ba pynmih da ki plastic.

Ula batai ïaka rukom bret ñiut kiba pyut (biodegradable waste) kiba lah ban pynkylla kum ki sboh katba ki bym pyut (non biodegradable waste) pat kiba lah ban shna pynthymmai biang bad ban pyndonkam biang ïaki.

U Habandajop Lyngdoh uba long u nongtrei jong ka SURE ula ai ka jingbatai kumno ban pynkylla ïaki ñiut ba pyut kiba mih na ïing shet ja sha ka jingbam sniang bad sha ka sboh ban pyndonkam haka rep ka riang.

Kawei pat ka rukom shna sboh kaba ula batai kadei ka sboh ‘Bokashi’ ka buit shna ñiut ki nong Japan kaba da pdem ïaki ñiut kiba pyut kiba mih tang nakaba tam ban shet jingshet ha ïing ne ka Kitchen Waste. Kane ka sboh ka ban por tang 14 sngi ban pdem iaki jhur ki jhep, ka doh ba tam ban ïoh iaka sboh organic kaba lah ban pyndonkam pat haba thung jingthung naduh ki syntiew ki skud haduh ki jhut ki jhep bad kiwei kiwei ki mar rep mariang.

Ula batai ba ka sboh Bokashi ka їapher na kiwei pat ki jait sboh namar ka їarap pynïap їaki pylleng khñiang kiba pynjulor ïa u jingthung. La batai ruh ïaka LAB (lactic acid bactaria) bad ka IMO (indigenous micro organism) kiba la pyndonkam ha ka ban shna їa kane ka sboh.

Nalor ka Bokashi composting, u Habandajop ula batai ruh ïaka Natural composting kaba juh leh ki longshwa kaba shu pdem bad long sboh, ka Vermic compost ne ka sboh ba pynmih da ka eit wieh bad ka Berkeley Compost kaba lah ban ïoh ïaka sboh tang hapoh 18 sngi da kaba pyndonkam ïaki phlang im, ki phlang ïap, eitmasi, ka um, ka jar, ka plastic bad u tyllai ban shna ïa kane ka sboh kaba la tip kum ka sboh organic ne bym khleh dawai.

Hashwa kane u ma Lamsalanki Pariat president ka KYKWM haka jingkren maitphang ula ïathuh ba ka seng Khooid Yaka Wah Myntdu la seng ïaka haka 19 tarik Kyllalyngkot 2021 da ka jingthmu ban ïada bad pynneh pynsah ïaka wah Myntdu kaba bsa umbam umdih bad ker sawdong ïaka sor Jowai, hynrei hadien bala lang ki ñiut haka Jowai kila shim iaka sien jam ban pynlong iaka jingai jinghikai ban pynkylla sboh iaka ñiut.

Ha kane ka jingpynshai paidbah la sakhi ba khambun ki dei ki longkmie kiba iashimbynta bad kane kala ai mynsiem iaka synjuk kaba pynlong ia kane ka jingai jinghikai ban ioh ia u soh ha ki sngi ki ia ban wan.