Sdang ka jingpynkhreh ia ka Shad Suk Mynsiem 2024 ka Seng Khasi Kmie
Ka Seng Khasi Kmie, Mawkhar Shillong haka sngi Ïewduh, kata 1 tarik u Ïaiong 2024, ka la pyndep ia ka bynta jong ka lehniam pynkiew ksing, kaba long ka sngi jong ka dak ban pynriew ia ka ksing ka nakra ka bom ka tangmuri, ban pynbna iar sha u paid jong ka Bri Hynniewtrep Hynniewskum, jong ka jingwan ban poi ka aiom ka shad ka kmen ha ka dur ka shad ainguh katta ka Shad Suk Mynsiem, kaba mynta ka kynti, ia kane ka shad ainguh ai dem ia U Blei Trai Kynrad kan long ha ki lai sngi, kata ha ka 13 ka 14 bad ka 15 tarik mynta u bnai Iaiong ha lympung shad ha madan Weiking, Jaiaw, shillong.
Ia ka lehniew pynkiew ksing ka pyndep ha Hall jong ka Seng Khasi Kmie, ha kaba ia ka nguh ka dem ka khnong ka bishar la pyndep ia ka da u dkhot ka kynhun u riew tymmen riew san ka Seng Khasi Kmie u Rgh Donbokstar Kurkalang.
![](https://www.syllad.com/wp-content/uploads/2024/09/JIT-Vacancy-823x1024.avif)
Kiba la wan ban ia sakhi lang ia ka sngi lehniam jong ka pynkiew ksiang ka kynthup naduh u President bad General Secretary ka Seng Khasi Kmie u Rgh O. Pyngrope bad u Rgh Hainess Marbaniang, ryngkat ki dkhot ka Jylli Pyrkhat Kam (JPK) bad ki dkhot ka Seng Kynthei, katba ia ka jingialang baroh kawei la pyniaid ia ka da u Rgh D.L Nongbri Vice President Seng Khasi Kmie bad ia ki kyntien ai khublei la ioh na u Rgh Hamar Singh Kharhmar ba dei u Cultural Secretary Seng Khasi Kmie.
Ha kane ka kynti ka kynhun ki duhalia kiba ka Seng Khasi Kmie ka la ibit ia ki ban pyndep ia ka put ka tem ka jong ki ka dei shi kynhun ki samla kiba la dep ban pyntbit bad pynjanai ha baroh ki sur ksing ne skit ka kynthup ia ki khynnah Na Tbian Ki Sur Hara ka kynhun ka La Syrdoh.
Hadien ba la dep ka nguh ka dem ka shat ka khien ka khnong ka bishar da u riew tymmen riew san, la sdang ban tem put ia baroh ki hynniew skit, kum ka dak jong ka jingsdang ka jingpynkhreh pynkhrum ia ka Shad Suk Mynsiem mynta ka snem.
Kumba ka juh long ka sur ksing ba nyngkong ba latem bad pynsawa ia ka dei ka ‘Ksing Lumpaid’ ka dak jong ka jingialap bad wer ia u kur u kha u marjan marpa najan bad na jngai ba ka sngi ka ia jong ka shad ka kmen ba shi sien shi snem kane ka la wan poi, da kumta ban long kiba la pynkhreh naka bynta ban iashim bynta sha ka shad ka kmen.
Shuh shuh ba dei naduh kane ka sngi ba ka Cultural Committee ka Seng Khasi Kmie man la ka janmiet kan pynlong ia ka jinghikai shad ia ki khynnah bad kumjuh ia baroh ki samla kynthei bad shynrang.
Leave a Reply