Sdang ka jingpynkhreh iaka lehniam Behdienkhlam, mih paidbah ban sop phlang iaka iing Langdoh

Syllad | The Rising MeghalayaMarch 3, 2025

Ka Raid Jowai lyngba ka Dorbar Niam haka jingialam u Doloi kum u khlieh ka niam haka 2 tarik Lber ban pynkhreh iaka jingwan ka lehniam Behdienkhlam, kila sdang shuwa da ka jingsop phlang ha iing Langdoh, kaba bun na ki jinglehniam la pyndep ha kane ka ïing.

Ki Rangbah bad samla kila mih ryntih shriak ban law ia u phlang barim bad sop da u phlang thymmai haka jingiadonlang ki riew rangbah ka Seinraij Jowai.

Shwa ban sdang sop phlang iaka ïing Langdoh, u Doloi Ma Puramon Kynjing ryngkat u Pator, u Langdoh, ki Sangot, ki Phra kur Phra kmai kiba don bynta haki kam jong ka Raid kila nguh la dem iaki blei ki syiem.

Haba iakren bad u Ma Puramon Kynjing ula iathuh ba ka jingsop phlang iaka ïing Langdoh kadei ka rukom, dustur ba la hikai naduh ki longshwa namar ha kane ka iing ia kiba bun ki kam niam jong ka Raid ka shnong la pyndep lyngba kane ka iing kaba long katkum ki hukum adong u nongbuh nongthaw.

Shuh shuh ula ong kane ka jingsop phlang ka long ruh shibynta ka jingwanrah ia kata ka jingsngew ban don kajuh ka jingkitkhlieh hapdeng ki khun ka Raid na ka bynta ka bha ka miat ka ïing Langdoh.

Nalor kata ula ong ruh ka jingwan iashim bynta kiba bun ba lang haka jingsop phlang ka long ruh kum ka dak ka jingsngewnguh sngewburom ka pateng iaka Beipun Doh kaba dei ka nongkha iaka pateng ka ban pyndep iaki kam niam na ka bynta ban ioh ka shnong ka raij iaki jingkyrkhu kyrdoh bad ka bit ka biang ha baroh ki liang.

Ula iathuh ruh ba ha kane ka ïing Langdoh u Doloi u pyndep iaka kam bishar khadar na ka bynta ka shongsuk shongsain bad ban bha ban miat ki khun ka raij ka shnong.