Sdang ka jingpynkhreh iaka lehniam Hima Khyrim, mih paidbah ban sop phlang iaka iing sad iing sunon

Syllad | The Rising MeghalayaOctober 17, 2022

Ka por ka samoi jong ka jingpynkhreh ia kawei na ka jinglehniam kaba khraw bad bna nam tam ha ka jylla katta ka Shad bad ka Pomblang jong ka Hima Khyrim kaban long ha ka 6-7 tariki u nai Naiwieng 2022, ka la sdang da ka jinglah ban pyndep ia ka Phing Phlang bad hynne pat ka sngi ka 17 tarik u nai Risaw 2022, ki paid nongshong shnong ka Smit naduh ki Rangbah bad ki samla kila mih ryntih shriak ban pyndep ia ka kamram ban sop ne tap ia ka iing sad ka iing sunon, kaba ha ka kynti kaba mynta la jingsop ne tap phlang ka dei ia ka bynta lam sepngi jong kane ka iing sad ka iing sunon.

Haba phai sha ka phing phlang, ia kane ka kam la pyndep ia ka ha ki  ki 6 sngi hapoh ka jingialam ka jong u Lyngdoh ka Raid Nongbri.

Ki shnong ki thaw kiba la wan ban iashim bynta ha ka ban ia phing phlang ka long kat kum ka sngi ka ia kaba la bud bad pynbeit ryntih ia ki, katta ha ka 1 tarik Risaw ba dei ka sngi Rynghep la sdang da ka kynhun na ka shnong Umphrup, bud pat sa ka kynhun jong  Umiew Maw U Saw bad Umtngew ha ka 3 tarik ba dei ka sngi Pamtiah, ha ka sngi Iewduh jong ka 5 tarik la wan ban mih paidbah sa ki nong shong shnong ka Thangsning bad Laitdiengsai, ha ka sngi Lyngka jong ka 6 tarik la dei sa ka pali jong ka Mawlali, Thynroit bad Mawkatheiñ, sngi Iew Nongkrem katta haka 7 tarik la dei pat sa ka pali jong ki paid ka shnong Thadan bad Laitkseh.

Hadien ba la pyndep ia ka phing phlang, hynne pat ka sngi, ka 17 tarik u nai Risaw, ka jingpynkhreh ia kane ka lehniam bad shad ainguh ai dem ba shisien shi snem jong ka hima, ka la jam pat shaka bynta jong ka jinglaw bad sop thymmai ia ka iing sad.

Kumba dei ka riti ka dustur, shwa ka jingiashimti paidbah, u Sohblei na ka kur Mawroh, u la kiew halor ka iing sad iing sunon naka bynta ba un law ia u Satep, hadien kane, la shimti noh pat sa ki paid nong shong shnong ka Smit hapoh ka jingialam ka jong u Sordar ka shnong Smit bah Pynshongdor L. Nongbri, ha kaba la sakhi  ba wat hapdeng ka jingwan ban pynthut noh ka jong u slap uba ka wan ban ther jur, hynrei kumba la buh ia ka sngi ka iai ban pyndep ia ka kam, ki paidbah, ki la pynsted ia la ka kti ka kjat bad ban ia ia trei lang kum ka kynhun naduh ka pynkhuid ka pynsuba da kaba sar ia u pring, ban lum ban lang ia u phlang rim, nangta ban ia thir ia ki thri, ban ia thliej ia ki siej  bad kumta ter ter, hapoh ka jingpeit bad khmih jong ki ki khmat riew Rangbah, kiba la mlien bad tip bha shaphang kane ka kam.

Ha kum kane ka por, u Pa’iem, u Syiem Khynnah u Kong-ngor, ka Syiem Sad, ki kato katne ki Myntri bad kiba khraw ba tri jong ka hima khynrim, lem bad ki riew paidbah kynthei bad shynrang ki la wan ban ia sakhi ia kane ka sngi ne ban iarap ban ia ai lem ia ka kti ban ia sar ban ia pynkhuid pynsuba ban thiew kynbat.

Haba kren bad u nongthoh khubor, u Syiem ka Hima Khyrim Pa’iem Dr Balajied Sing Syiem, u la ong ba ha kum kane ka sngi, ki khun ki hajar ka shnong Smit ki la mih shynrang bad kynthei ban pyndep ia kane ka kam, kaba long kum shi bynta ka dak ka jingsdang ia ka jingpynkhreh ia ka lehniam leh rukom kaba shi sien shi snem jong ka Hima.

Haba kylli ia kiei ki dak jingkylla, kaba kum us Syiem u kmie u shem bad iohi ia kum kane ka sngi jong ka jingsop phlang ia ka iing sad ka iing sunon, na ka liang u Pa’iem u pynpaw ba ha ki por ba u dang samla, ki da don shisha ki riew rim kiba ha kum kane ka sngi jong ka jingsop phlang thymmai ia ka iing sad ka iing sunon, ki da nang shisha ban sop, hynrei katba nang iaid ki sngi ki ia, ka jingbym don shuh ki riew rim, ka pynlong ia ka Hima ba ia kum kane ka sngi, ka hap ba kan khot ne ban wer lang ruh ia ki khun ki hajar na kiwei pat ki shnong ki thaw, ban wan haka ban ai ia ka kti kadiang kti kamon ban iarap ban sop ia ka iing sad ka iing sunon.