Sdang ka jingpynsngewthuh ban pyniakhlad iaki ñiut na ïing ha Jowai

Syllad | The Rising MeghalayaJune 6, 2022

Ka jingthud ka rukom pynlang ñiut ka Jowai Municipal Board na ka daw ka jingbym ioh iaka jaka theh niut kaba paka kala pynlong iaki nongshong shnong ka Jowai ban kylla haka rukom pyrkhat ban iakhun pyrshah iaki jaboh plastic.

Kane ka jingeh jong ki ñiut klala pynduh thiah pynduh dem iaki nongialam shnong bad ka bor synshar district kumjuh ka Jowai Municipal Board kabym don u pud u ang treikam bad ka kam kaba ka leh ka dei tang ban pynlang iaki niut ha Jowai bad kane ruh kala phiel.

Ka Synjuk ki Waheh Shnong kala mudui da ka jingujor mukotduma ne ka Public interest litigation (PIL) sha ka iingbishar ba donburom ka Meghalaya High Court. Ka Meghalaya High Court kala tangong iaka State Administration bad bad ka Jowai Municipal Board ba ki dei ban pynthikna ban pynlang iaki ñiut na ki ïing briew bad ki iew ki hat.

Wat la katta ruh ki don ki bor shnong kiba la tynrong halade iaka jingkitkhlieh ban ialeh bad ki ñiut kiba mih na ki ïing briew ban sdang noh ban pyniakhlad ia kiba pyut bad ki bym pyut ne ki jaboh plactic, ki tiar electronic bad kiwei kiwei kiba ktah iaka mariang.

Ki ar tylli ki shnong kiba la iaid shakhmat ban pyniakhlad iaki niut ki dei ka Loompyrdi Iongpiah bad ka Chilliangraij.

Kila don bun ki shnong ha Jowai kiba la pyrshang ban pyniakhlad iaka ñiut kynthup iaka Caroline Colony, pynban na ka daw ba phiel ka JMB kane ka jingpyrshang ka jong ki kala bijai eiei.

Ka Loompyrdi Iongpiah kala iatrelang bad kynhun ka Society Urban and Rural Empowerment (SURE), ka Young Minds Collective, katba ka Chilliangraij kaba sdang iaka jinghikai ha ka sngi Saitjain jong ka taiew kaba la dep ban pynsngewthuh iaki paidbah halor ka jingdonkam ban pyniakhlad iaki ñiut da ka jingiatreilang bad ka Seiñ Kynjei bad ka SURE.

U Franky Laloo, Environment Engineer na ka MSPCB bad u Dr. HH Mohrmen na ka SURE ki la long ki riew shemphang ban pynsngewthuh iaki paidbah halor kumno ban pyniakhlad iaki ñiut naduh na ïing ne ka segregation of waste at sources.

U Franky Laloo ula batai halor ka aiñ treikam ka Waste Management Rules 2016 katba u Dr. Mohrmen ula batai u kumno ban pynkylla sboh bad pynkylla bam sñiang ïaki mar bam ba pynmih na ki ïing ki sem.

Ïaka jingïalang la pynïaid da u General Secretary ka Chiliangraij, u Orilan Shylla katba u Waheh shnong, u DH Pde ula ïathuh ïaka jingshem jingeh shem shitom ki longïing haba ïadei bad u ñiut.

Hadien ka jingai jinghikai la sam ïaki jaka bret ñiut kiba don la ka jong ka rong na ka bynta ban pynïakhlad ïaki ñiut hapdeng kiba pyut bad ki bym pyut.