Sdang ka jingrakhe dap 50 snem ka West Jaintia District Sports Association kular u MLA Jowai ban ai T.3 lak

Syllad | The Rising MeghalayaFebruary 27, 2022

U MLA ka Jowai Constituency Ma Wailadmiki Shylla ula plie pyrda iaka jngrakhe dap 50 snem ne Golden Jubilee (1972-2022) ka West Jaintia Hills District Sports Association (WJDSA) haka jingialang kaba long ha Kiang Nangbah Indoor Stadium, Ladthadlaboh haka sngi Saitjain.

Ha kane ka sngi U Ma Wailadmiki kum u kongsan ula khyllie ia u shap ne logo rakhe dap 50 snem ka WJDSA haka jingiadonlang u Ma EMH Passah Working president WJDSA, u Ma Lammat OO Laloo, Ma Khroobok Passah DSO, West Jaintia Hills, u Founder Member ka WJDSA Ma SK Lato, MDC North Brighstar Chyrmang, Octomewot Lamin Nominated MDC bad kiwei kiwei.

Haba kren kum u kongsan Wailadmiki Shylla ula kular ban ai T.3 lak nalor ka jingiarap pisa lyngba u Myntri Rangbah T.15 lak naka bynta ka jingrakhe iaka jingdap 50 snem ka WJDSA ban pynlong iaki prokram baroh shinsem lynter.

Ula ai mynsiem ïaki nongkitkam ka WJDSA ba kum u nongmihkhmat un don ryngkat ryngkat bad ka synjuk ban wad ki lad ki lynti kumno ban nang pynkiew shuh shuh ïaka kam ïalehkai hapoh ka District bad kumjuh ban plie lad iaki nongialehkai ban mihkhmat wat sha ki lympung bad ki rynsan ba heh haka ri bad ka pyrthei.

Ula ong ba Wahiajer multi sports complex kaba la dep ban buh mawnongrim da u Myntri Rangbah ka Jylla Conrad K Sangma kala iaid shait shait bad u khmih lynti bad ka jingdon kane ka madan kan iarap ban ioh sei iaki sap ba nylla jong ki khynnah bad ki samla hapoh ka district.

“Ka sorkar kala dep pass ruh iaka State Sports Policy khnang ban ïoh jingïarap ki khun samla khamtam ki rangïalehkai,” la ong u ma Wailad bad bynrap ruh ba shen yn sa pyllait iaka pisa kaba T.10 lak lyngba 15th Finance Commission naka bynta ban tei iaki jingtei kum ka painkhana bad kiwei kiwei.

U Ma EMH Passah haba kren iaka kyntien maitphang ula ong ba iaka WJDSA la tip iaka kum ka JDSA bad dei hadien bala phiah district Jaintia Hills District la kylla sha ka WJDSA bad kala pynïasoh (Affiliate) ruh bad ka Meghalaya Football Association, Meghalaya Athletic Association, Meghalaya Basketball Association, Meghalaya Archery Association.

Ka WJDSA kala pynmih shibun ki player football bad kiba la ialehkai ruh haka I-League bad kumjuh haka athletic bad ka Shillong Sports Association ka ïoh ïaki rangïalehkai na kane ka District, la ong u ma Passah.

Ka WJDSA ka long kumba ka long mynta ka dei ka jingkyrshan jong ki dorbar shnong bad ki dong ki shnat haduh bala ioh ban thied iala ka jong ka jaka ialehkai- U Kiang Nangbah Stadium bad da ka jingiarap ka sorkar kala ioh ruh ban tei iaki jingtei kumjuh ban shna iaka madan. Ka WJDSA ka juh ïashim bynta ha kiba bun ki lympung kum ka Bordoloi Trophy, Governor Cup bad kiwei kiwei ki lympung.

Ula ong ruh ba kane ka synjuk kala pynmih ruh iaki National Referee bad International Referee kiba kynthup ia u Romanium Syngkon, ka Riiohlang Dhar, kaba la sdang iaka jinglong referee jong ka na WJDSA bad kala pyniaid iaka football ha Shillong bad ka WJDSA ka sngewsarong ba kala ioh iaka kyrdan FIFA Assistant Referee.