Sdang ka jingrakhe jubili rupa ka Wapung Sec School

Syllad | The Rising MeghalayaDecember 16, 2022

Ka Wapung Secondary School kaba la sdang da ka Dorbar Shnong Wapungskur, East Jaintia Hills District ka la sdang ia ka jingrakhe Silver Jubilee haka sngi Balang bad kane ka jingrakhe kan neh baroh shisnem lynter.

U Myntri Sorkar u James P. Kongkal Sangma ula long kum u kongsan u MDC ka thain ma Phasmon Dkhar, EM ka JHADC bad u ma Nehlang Lyngdoh, MLA barim ka thain, ki la long kum ki symbud kongsan.

La iadonlang ruh kiwei ki EM ka JHADC, u Waheh Shnong ka Wapungskur, u ma H. Deolangki Dkhar, ki Waheh Shnong barim naduh u Norly Ryngkhlem bad u Satly Ryngkhlem, ki Nongialam & dkhot ka Executive Committee Shnong, ki Nongialam & dkhot jong ka SMC bad kiwei kiwei haka jingialang kaba pyniaid da u ma Speinglang Rymbai – Chairman ka SMC.

Ka kong Kyntilang Dkhar,  Headmistress ka skul kala iathuh ba kane ka skul la seng ia ka da ka Dorbar Shnong Wapungskur naduh u snem 1978 kum ka Wapung Upper Primary School bad lah upgrade ia ka sha ka Secondary Level ha u snem 1998. Ka sorkar jylla, lyngba ka MBOSE ka la ai ia ka Opening Permission ha u snem 1999 bad lah recognize ia ka kum ka Regular School ha u snem 2015. Ha u snem 2017, ka Dorbar Shnong ka la upgrade pat ia katei ka skul sha ka Higher Secondary Level.

Kane ka skul ka don 400 ngut ki khynnah skul.

U James PK Sangma haba kren ula ong ula ai ka jingiaroh iaka bor pyniaid jong ka skul bad ula nang kitbok kitriwiang ba kane ka skul jam shakhmat haka jingiaid lynti bad ai mynsiem shuh shuh iaki nongialam shnong ka SMC ban pynlut shuh shuh ka por bad ka bor ban kyntiew iaka skul bad ban sam ka jingnang jingstad kaba bha tam katkum ka jingiaid ka por.

U kongsan u la ai khublei ruh ia u ma Nehlang Lyngdoh uba la noh synniang sha katei ka skul ha ka por ba ka sdang ban tei ia ka building, bad ruh u la ai khublei ia u Phasmon Dkhar uba la synniang da ki kamra klas. Khatduh u James Sangma u la kular ban ia kren bad u Myntri Rangbah ka Jylla, u Conrad Sangma ban pynioh iaka jingiarap iaka skul katkum ka memorandum kaba la ai ha u.

Kiwei kiwei kiba kren ki kynthup ia u MDC ka thain Phasmon, Nehlang Lyngdoh, H. Deolangki Dkhar, Waheh Chnong ka Wapungskur bad kiwei kiwei. iaka kyntien ai khublei la ai da u Aristotle Rymbai  dkhot SMC kane ka skul.