Sdang ka jingthep kyrteng ha West Jaintia Hills

Syllad | The Rising MeghalayaFebruary 4, 2023

Ka jingthep kyrteng ki Candidate ban iakhun iaka election MLA sha ka iing dorbar thaw ain ka Jylla kala sdang ha West Jaintia Hills District haka 4 tarik u bnai Rymphang.

Ha kane ka thep kyrteng u ma Lasting Suchiang kyrtong ka Trinamool Congress na 4 Mowkaiaw Assembly Constituency u dei u kyrtong ba nyngkong ban thep kyrteng ban iakhun ia ka election.

U Ma Lasting u iehnoh iaka kam Lab Technician haka tnad Health & Family Welfare. Un aireng pyrshah ia u MLA ba mynta na Mowkaiaw u ma Nujorki Sungoh.

U MLA ka Natiang bad myntri sorkar u ma Sniawbhalang Dhar ruh ula thep kyrteng ban iakhun iaka elekshon bad kane ka dei ka sien kaba saw ban pan biang ka jngkyrshan u paidbah ban rung ha Assembly.

Uwei pat u kyrtong uba la thep kyrteng u dei u ma Shemhok Garod MDC barim ka Nangbah na ka seng PDF. U Ma Shemhok un iakhun iaka election na Raliang Constituency pyrshah ia u MLA ba mynta u ma Coming one Ymbon.

Shuh shuh u MDC ka Sutnga Saipung u ma Richard Sing Lyngdoh ruh ula thep kyrteng ban iakhun na Raliang.

U MLA Raliang u ma Coming One Ymbon ula thep kyrteng ban iakhun biang iaka elekshon ban rung biang sha ka assembly haka sien kaba saw.

Uwei pat u MLA UDP u ma Nujorki Sungoh ula thep kyrteng ban iakhun iaka elekshon na Mowkaiaw constituency.